Talisay nag-una sa mga kaso sa dengue sa Sugbo
Nag-una na ang dakbayan sa Talisay sa mga dapit sa probinsiya sa Sugbo nga dunay labing daghan nga mga kaso sa dengue fever.
Sa kinatibuk-an, moabot sa 2,924 ang dengue cases nga natala gikan sa Enero hangtud sa Hulyo karong tuiga.
Sa Hulyo, anaa sa 219 ka mga kaso ang natala, mas ubos hinuon sa 282 ka mga kaso sa Hunyo.
Matod sa dengue coordinator sa PHO, Cyril Pangatungan, ang dakbayan sa Talisay nitala og 282 ka mga kaso sa maong makamatay nga sakit sa unang pito ka mga buwan.
Gisundan kini sa lungsod sa Consolacion nga dunay 253 ka mga kaso, 186 sab sa lungsod sa Argao nga maoy ikatulo sa nitala og daghang mga kaso sa dengue.
Ang Danao City ug Toledo City naapil sa top 5 nga nitala og 176 ug 158 ka mga kaso sa maong sakit.
Giklaro ni Pangatungan nga posibleng mapun-an pa ang maong gidaghanon sanglit wala pa maapil niini kadtong mga pasyente nga gidala sa pribadong tambalanan.
Ag data sa PHO gikan lang sa pampublikong mga opistal ug sa mga rural health unit.
Karon lang buwana, usa ka 2-anyos nga batang lalake ang labing bag-o nga nakalas tungod sa sakit nga dengue.
Ang PHO nikompirmar nga namatay kagahapon ang maong bata sa lungsod sa Sta. Fe, isla sa Bantayan.
Subay niini, gipadayag ni Pangatungan nga suroyon nila ang maong dapit karong adlawa aron mopahigayon og integrated vector management ug misting operation.
Kagahapon, nagpahigayon og clean up drive aron matubag ang suliran sa makamatay nga sakit nga mugna sa hugaw nga palibot.