Espenido i-destino sa Carcar?
Human sa malampuson nga pagpuhag sa ulo ug mga kuyamoy sa gika-intapan nga Kuratong Baleleng Gang sa Ozamis City nga gipanguluhan ni anhing Ozamis City Mayor Reynaldo "Aldong" Parojinog, daghan na ang mihangyo nga adto ipa- assign si Chief Inspector Jovie Espenido sa ilang lugar aron masumpo usab ang illegal drugs. Daghan mi- text nako nga taga Carcar City. Gusto nilang i-destino si Espenido sa ilang lugar.
Si Espenido maoy nangulo sa mga pulis sa Ozamis City ug CIDG 10 sa pag- serve sa warrants of arrest batok sa mga Parojinog nga miresulta sa kamatayon sa mayor, iyang asawa, duha ka igsoon ug mga bata-bata.
Nadakpan si Vice Mayor Nova Parojinog ug ang iyang igsoon nga si Konsehal Reynaldo Jr.
Si Espenido usab ang miunay pagronda sa panimalay ni Albuera, Leyte Mayor Rolando Espinosa Sr., amahan sa banggi-itan nga drug lord sa Eastern Visayas, Kerwin Espinosa Jr.
Gipatay ang mayor sulod sa bilangguan sa mga sakop sa CIDG 8 nga gipanguluhan ni Supt. Marvin Marcos.
Dili basta-basta ang gibangga ni Espenido kay mga mayor sa lugar nga iyang gi-alagaran. Unya mga dagkong isda sa illegal drug trade.
Sa kaso lang sa mga Parojinog, dili basta-basta ang maong pamilya kay aduna kini sindikato nga gipaluyahan. Posible man gani nga mo-resbak o mobawos ang gropo ni Parojinog kay daghan baya na silag loyal nga mga sumosunod nga andam mopatay ug magpakamatay alang kanila.
Matod pa ni PNP chief Director General Ronald "Bato" Dela Rosa nga daghan ang mga mihangyo kaniya nga adto i-destino si Espenido sa ilang lugar aron masumpo ang illegal nga drugas.
Apan daghan pang buhaton ug tiwason si Espenido didto sa Ozamis human mapuhag ang mga Parojinog.
Kon puwede lang atong hangyuon ang PNP chief nga anha sa Carcar i-destino si Espenido kay naghitak ang drugas kay walay gihimo ang mayor. Morag malubatlubatan si Mayor Nice ana.