Pasensiya, pagsayo

Kitang mga yano nga lumolupyo daghang mahimo sa nagkagrabe nga trapiko sa Metro Cebu karon labi na sa N. Bacalso Avenue sa dakbayan sa Sugbo. Ang yaweng mga pulong - pasensiya ug pagsayo sa tanang lakaw seguradong mominos ang imong pagyawyaw. Hatagi og dili mominos duha ka oras ang gintang sa paggikan ngadto sa adtoan, depende sa gilay-on sa tuyo o trabahoan gikan sa gipuy-an.

Mas paborable ning panahona nga mosakay sa publiko sakyanan sama sa PUJ, bus ug taxi kon itande sa pagdala og pribadong sakyanan labi na kon mag-inusara sa biyahe. Lisod usab ang parking area sa dakbayan gawas niadtong dunay gitagana nga parking space. Dako na kini og matabang sa pagpaminos sa gidaghanon sa nagdagan nga sakyanan sa kadalanan.

Matod pa, ang trapiko usa sa mga kaluhang problema sa nagmalambuong ekonomiya apan, ang makatuoran walay klarong saktong plano ang mga piniling opisyal ug nanagdumala sa hingtungdan mga ahensiya sa kagamhanan.

Ug ang pangindahay sa tanan: magkahiusa ang mga politiko nga isalikway ang away sa pulitika o personal nga interes ug ang gipaabot nga mass transport system ipatuman na ug ubang imprastraktura nga malahutayong kasulbaran sa trapiko.

Ang problema sa trapiko maoy komon nga isyu nga gipanag-istoryahan sa mga adunahan ug mga kabus sa Metro Cebu. Apektado ang tanan sa kalangay sa pagbiyahe sulod sa dakbayan. Kanhi ang gilay-on nga biyahion lang 10 minutos, posibleng usa ka oras na karon. Ug kon walay igong plano, seguradong hinungdan sa pagkaalkanse sa usa ka negosyo.

Sa habagatan sa dakbayan sa Sugbo, ang daan nang trapik nga dapit sa N. Bacalso misamot tungod sa pagsugod na sa trabaho sa tunnel o underpass sa eskina sa F. LLamas sa pagpaningkamot nga masulbad o dunay alibyo sa problema. Hinaut unta uban sa pag-ampo. Sa pagkakaron, pasensiya una ug magsayo kita.