Pasidaan sa mga hospital management
Daghang mga reklamo nga ang mga hospital dili mo- admit o dili modapat og tambal o di moatiman sa usa ka pasyente kon di makadeposito sa gisitar nga kantidad. Dunay mga pasyente nga nangamatay, ilabi na niadtong mga kaso sa emerhensiya, kay way kuwartang ika-deposito.
Ang mga nagdumala sa mga hospital monsistir sa deposito ug moingon nga wa silay mahimo kay mao man kini ang lagda sa management sa maong hospital.
Kini bisan pa kon duna nay balaod nga nagdili niini. Mao kini ang Batas Pambansa Bilang 702, “An Act Prohibiting the Demand of Deposits or Advance Payments for the Confinement or Treatment of Patients in Hospitals and Medical Clinics in Certain Cases.”
Gipirmahan ni Presidente Rody Duterte niadtong Agusto 3 ang usa ka balaod nga nagpahamtang sa mas bug-at nga silot ngadto sa mga hospital ug mga clinic nga magdumili sa pagdapat og tambal niadtong mga pasyente sa mga kaso sa emerhensiya ug grabeng balatian kon way deposito.
Ang maong balaod, Republic Act No. 10932, “An Act Strengthening the Anti-Hospital Deposit Law, nag-amendar sa Batas Pambansa Bilang 702. Ang Section 1 sa RA 10932 nagdili sa mga kawani sa usa ka hospital o clinic sa pagpangayog deposito ug bisan unsang matang sa advance payment sa di pa sila moatiman sa
usa ka pasyente sa mga emergency cases.
Ang maong balaod nag-ingon nga ang usa opisyal, medical practitioner o kawani sa usa ka hospital o medical
clinic nga makonbikto sa pagsupak sa maong balaod pahamtangan sa silot nga pagkabilanggo sa di momenos sa unom ka buwan ug usa ka adlaw ug di molabaw sa duha ka tuig ug upat ka buwan o kaha multa nga di momenos sa P100,000 apan di molabaw sa P300,000. Mahimong dungan nga ipahamtang ang silot sa pagkabilanggo ug multa agan sa kabubut-on sa hukmanan.
Kon ang kalapasan mahimo tungod sa lagda o sugo sa management, ang director o opisyal sa hospital nga responsible sa paghimo sa maong lagda, pahamtangan sa silot nga pagkabilanggo sa upat ngadto sa unom ka tuig ug multa nga di momenos sa P500,000 apan di molabaw sa P1,000,000. Mahimong idungan ang silot sa pagkabilanggo ug ang multa segun sa kabubut-on sa korte.
Mahimong kanselahon sa Department of Health ang lisensiya sa hospital human sa tulo ka kalapasan. Mahimo lang nga modumili ang hospital sa pagtambal kon kuwang sila sa kahimanan, “by reason of inadequacy of the medical capabilities.” Mahimong ipabalhin sa attending physician ang pasyente ngadto sa laing hospital apan kinahanglan una nga hatagan siyag emergency treatment.