I just walk away
Wa makamatikod sila si Jeric ug Nikki nga nagsunod ko nila. Naglakaw sab sila sa sidewalk, ambot kon asa kaha sila mopaingon. Apan nasabtan ko nga morag nag-away sila. Duna silay gilalisan. Mipaduol pa gyud ko nila aron madungog ko ang ilang giestoryahan.
“Nganong si Noel man gyud ang imong gipaangkon anang imong gisabak? Nagbuwag na nuon sila si Helen!” Nasuko si Jeric. “Unsa man diay akong buhaton, bi, Jeric? Gibuhat ko kini, uy, aron magkabuwag gyud sila ug ako ang pakaslan ni Noel in the future!”
Nasuko sab si Nikki. Nainteres gyud ko pag-ayo sa ilang gihisgotan. Naapil mi si Noel.
“Unya, di man tinuod nga si Noel ang amahan anang bata nga naa ron sa imong tiyan? Ako may amahan ana, Nikki!”
“Basta ipaangkon gyud nako ni kang Noel. Love gyud nako siya, uy!”
“Klaro na nako ron nga mao diay nga gisugot ko nimo aron matuman ang imong plano. Nakahibawo ka man nga kanunay mi magkuyog si Noel kay best friend man mi. Gihimo lang diay ko nimong bridge aron kanunay ka sab nga mahiduol kang Noel?”
Misamot kasuko ang tingog ni Jeric. Nabatyagan ko nga misakit ang akong dughan. Tinuod diay gyud ang gisulti ni Noel nako nga wa ko niya luibi. Pagkadali ko ra siyang gihukman nga nakasala sa among relasyon. Kahilakon ko kay naluoy kaayo ko kang Noel.
“Giplano gyud diay nimo ang tanan, Nikki. Nakig-inom ka namo ni Noel sa inyo kay wa ang imong mga ginikanan. Unya gipapauli ko nimog una kay hubog na ko. Wa ka hilabti ni Noel. Sa imong kuwarto nimo siya pakatulga tungod kay nahubog sab siya. Unya gihuboan mo siya ug naghubo ka sab aron inig mata ni Noel imong ipatuo niya nga dunay nahitabo ninyo. Selfish ka, Nikki!”
“Aw, kon mao nay imong pagtuo, naa ra nimo.”
Mihunong ko pagsunod sa duha kay mihuot gyud ang akong dughan. Igo ko na lang silang gilantaw nga nalayo na nako. Ang importante nako ron nga nadeskubre ko ang tinuod. Apan unsaon ko sa pagpakig-uli kang Noel? Mauwaw ko niya kay gihukman man dayon nako siya. Wa ko motuo niya ug wa maminaw sa iyang pagpasabot nako.
(SUMPAYAN)