Nagsalig lang
Dear Noy Kulas,
Tagoa lang ko sa ngan nga Liza. Naminyo ko og foreigner ug diri nieskwela ko aron makatrabaho diri. Supportive kaayo ang akong bana sa tanan nakong gusto. Pila ra may estorya, nakahuman ko, nakalisensya ug nakatrabaho.
Ako ang nag support sa akong pamilya diha. Sa tanan nilang needs ako silang gihatagan. Nagpatukod ko og balay, gipalitan og sakyanan ug uban pa. Bisan mga anak sa akong mga igsuon gigastuhan nako sa ilang pag-eskwela. Ang akong bana way reklamo bisan hapit tanan nakong suweldo padung na lang sa akong pamilya.
Karon nasakit ko ug advised to rest og six months. Kay wa koy savings nga dako, ang akong bana ang nanginabuhi karon. Magpadad anan mi pero di na sama ka dako sa akong pinadad an dihang nagtrabaho pa ko. Karon ang akong pamilya nangreklamo nganong gamay na lang ang among pinadad anan. Nasuko ug nagyawyaw. Naguol ko kay ang akong parents maoy pirme yawyawan sa akong mga igsuon. Unsa may akong buhaton, Noy? Naluoy ko sa akong parents pero wa koy mahimo. LIZA
Liz, Wa ka mag-inusara. Kadaghan na ko makadawat og suwat pareho sa imoha. Naa sab na sa social media diin nagyawyaw intawon ang mga hingtungdan nga sama kanimo. Luoy baya. Daghan ang nagtuo nga haruhay diha kay kwentahon lagi ang dolyar ngadto sa peso. Unya dolyar man sab ang gasto diha.
Sakto na ang imong pagtabang nila kay kon buot huna-hunaon, di na nimo responsibilidad ang imong mga igsuon. Labaw nang di na nimo responsibilidad unta ang imong mga pagumangkon. Isip anak, ang imong mga ginikanan maoy primary responsibility nimo.
Estoryahe directly ang imong mga igsuon sa nahitabo nimo, mosabot man sila o di. Hinuon, partly mabasol sab ka kay imo silang gi- spoiled. Mas maayo man gud unta kon imo silang gihatagan og kwarta pang capital ba ron og negusyo kay sa magsalig lang sila sa unsay imong gipadala.
Unaha ang imong kaugalingon karon. Ayaw sila huna-hunaa kay kon maunsa ka o dunay dautang mahitabo kanimo, mas makaluluoy sila. Pag-ampo sa Ginuo nga ayuhon ka ug kanunay kang hatagan og maayong panglawas. NOY KULAS