Ang gipangayo ni Tessie

When I come back, I’ll marry you!” mao ni ang katapusang pulong nga gibuhian ni John ngadtong Tessie sa dayong kanaog niini sa panimalay sa dalaga. Usa pa lang ka semana ang panagkaila ni Tessie ug sa Amerkano.

Tindera og barbekyu ug puso si Tessie sa baryo Ginit ning dakbayan. Dili siya maanyag, apan buotan. Probinsiyana nga Maria Clara ug naghambin sa kinaiya sa usa ka dalagang Pilipina nga maoy iyang gipakita sa Amerkano.

Sa unang panagkita nila giila-ila siya ni John nga 38 na ang pangidaron. “Will you be my girlfriend?” giingnan siya ni John.

Nagpahiyom si Tessie nga mitubag, “I am a girl. And I am your friend now!”

“I mean, a romantic girlfriend or sweetheart!” ni John. “It’s up to you,” ni Tessie. Nagtuo siya nga nagkomedya lang si John. Misakay lang siya sa komedya niini, kay bisag usa ka Pinoy nga lalake way nanguyab niya.

Kada adlaw sulod sa pito ka adlaw, mibisita si John kang Tessie. Miadto sa ilang balay ug nakigkita gyud sa ginikanan sa dalaga. Sa katapusang adlaw nga mouli na si John sa Amerika, nanaad kini nga mobalik aron pakaslan siya.

Wala hatagig importansiya ni Tessie ang gisulti ni John. Wala siya motuo.

“Kinsa ba god kong prinsesaha nga pangasaw-on niya? Nga kaguwapo niya?!” tuaw ni Tessie sa hilom.

Paglabay sa tulo ka bulan nahibalik si John ug gihikay niya ang ilang mga papeles aron makasal. Dangtag duha ka semana gikasal sila sa huwes. Sa tago siging gikusi ni Tessie ang iyang aping aron pagsuta kon wa ba siya magdamgo lamang. Hangtod nasayran niya ang hinungdan nganong siya ang gipili ni John nga pakaslan.

Sa asoy ni John, unom ka buok ang iyang penpal. Iyang gibisitahan tanan sa una niyang pag-anhi sa dakbayan. Ang una nangayog house and

lot. Ang ikaduha nangayog kotse. Ang ikatulo nangayog kuwarta nga ipuhonan sa negusyo. Ang ikaupat nangayog kuwarta ug magpa- tour around the world.

Ang ikalima ug ikaunom, susamag gipangayo sa nahiunang upat.

“Now that we are already married, what would you like to ask from me?” matod ni John samtang ang ilang gisakyang wedding car nagpadulong sa restawran sa usa ka dakong hotel diin didto gipahigayon ang ilang reception.

“I want only your love!”ni Tessie nga malimbationg mitutok kang John.

“Since you ask only for my love, I would give you not only that. I will give you everything I have to make you happy!” ni John, dayong halok sa mga ngabil ni Tessie.

Gibati ni Tessie nga daw siya si Cinderella ug naglutaw sa Cloud Nine. Wala siya magdahom sa iyang naangkon nga suwerte sa kinabuhi.

(KATAPUSAN)