'TUMANG BINUKBOKAY'
Grabeng binukbokay ang gilaumang masaksihansa Cebu Extreme Fight League (CEFL) - “Respect” nga ipahigayon karong Agusto 26 sa Cebu City Sports Institute.
Sa main event, engkuwentro sa dekalidad nga striker ug
grappler ang gilauman sa panagsangka nila ni kanhi boksidor Tonix Borres batok Citi BJJ blue-belt Cipoz Guadez.
“Isaad nako nga ipagawas gyud nako ang tanan nakong nakamauhan aron makuha nako ang daog,” matod ni Borres, kinsa sakop sa JB Dream Fitness Gym. Si Borres nasubhan sa mixed
martial arts og unanimous decision nga kadaugan batok sa beteranong si Ervin Mosico sa miaging tuig.
Gisundan kini niya og laing unanimous decision nga kadaugan batok kang Emmanuel Mogawa.
Sa iyang bahin, si Guadez usa ka gold medalist. Gihulagway nga usa siya ka eksplosibong grappler ug bag-uhay lang nasaka sa blue-belt.
Mao man tuod kini ang labing unang away ni Guadez sa MMA apan alang kaniya, aduna siya’y igong kasinatian sa martial arts.
Sa co-main events, magsangka ang parehong strikers nga sila si Nigerian Simon Uchenna batok Rodel Valizado.
Si Uchenna, kinsa usa ka 2nd year Marine Engineering student sa University of the Visayas (UV), mosagubang sa labing una niyang away sa MMA. Sakop siya sa Yaw-Yan Ardigma.
Batok kang Valizado, kinsa aduna na’y tulo ka mga away, gilaumang malisod nga tahas ang pagatahakon ni Uchenna.
Aduna pa’y laing walo ka MMA ug upat ka kickboxing fights ang masaksihan sa promosyon.
“Nindot ang mga fight ani nga promosyon kay naay class A MMA fighters. I hope nga maka- promote ta og duha ka events every year,” matod ni organizer Master Benigno “Ekin” Caniga Jr., kinsa maoy founder sa Yaw-Yan Ardigma Cebu. Ang mga tiket sa promosyon nagkantidad og P700 sa cage-side seats, P500 sa VIP seats ug P200 sa free seating. Alang sa gustong magpareserba og mga tiket, mahimong motawag sa 0943-6568900. /