ILUGAY SA LIDERATO
Mga duwa karon 5:15 pm- USJ-R batok CEC ( jrs) 6:45 pm- USPF batok USC (srs) Ilugan sa University of San Carlos (USC) Warriors ug University of Southern Philippines Foundation (USPF) Panthers ang sayong liderato sa ilang panagharong sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.
Ang Warriors, runnersa miaging tuig, nasubhan og impresibong kadaugan batok sa defending champion University of the Visayas (UV) Green Lancers, 78-73, niadtong Dominggo.
Samtang ang Panthers, kansang puwersa nagkalig-on karong tuiga, ninglampornas sa Cebu Institute of Technology University (CITU) Wildcats, 78-73, sa premiro nilang duwa.
Bisan wala sila’y import, ang Warriors ni coach Bong Abad aduna gihapo’y saktong puwersa ug ilaha na kining napamatud-an sa ilang pagpukan sa Green Lancers, usa sa tulo ka teams nga nagtangag og import karong tuiga.
Ang Panthers usa sa mga adunay import karong tuiga apan sa ilang pagpakigbatok sa Warriors, gilaumang malisod nga tahas ang ilang pagasagubangon.
Dili ikalimod nga ang Warriors mao ang inilog ning sangkaa apan dili sila angayang molugak sa Panthers, nga mahulagway nga usa ka delikadong underdog.
Ang Warriors magsalig og maayo nila ni Victor Rabat, Michael Cabañog ug Julius Davis, nga nagkumboya og 44 puntos sa ilang kadaugan batok sa Green Lancers.
Gawas sa nangahisgutan, ang Warriors makasandig sab nila ni Froilan Mangubat, Lucky Ecarma, Malcolm Tan ug Ian Trangia.
Sa ilang bahin, ang Panthers ni coach Albert Alocillo mosalig og insakto kang Rodelio Cauba, kinsa nagpauwan og 22 puntos sa premiro nilang duwa.
Gawas kang Cauba, ang ubang mga sinaligan sa Panthers mao sila si Clyde Avancena, Lyndon Colina, Mike Patalihug ug import Rich Managor.
Si Managor igo lang nimugna og upat ka puntos sa premirong duwa sa Panthers apan gilaumang moulbo ra ang abilidad niini sa pagpadayon sa torneyo.
Sa premirong sangka, magabot ang Cebu Eastern College (CEC) Dragons ug University of San Jose Recoletos (USJR) Baby Jaguars sa high school division. Sa laing bahin, gipangmakmak sa USJ-R Jaguars ang CITU Wildcats, 97-60, sa college division niadtong Martes samtang gipangkusokuso sab sa high school defending champion Sacred Heart School-Ateneo de Cebu (SHS-AdC) Magis Eagles ang USPF Baby Panthers, 93-50.