P2 M NGA SHABU ANG NASAKMIT

Upat ka mga bigtime pusher sa dakbayan sa Danao nadakpan sa managlahing buy bust operation kagahapon sa kaadlawon sa mga Barangay Poblacion, Sabang ug Maslog, dakbayan sa Danao.

Mga suspek nga nasikop mao sila si Gerry G. Gallon Jr., Velmar Lavador, Robert Angtod, ug Jose Quilaton, pulos bag-ong giilang mga bigtime

drug pusher sa Danao. Nangu sa operasyon mao si Chief Inspector Gerald Ace Pelare, hepe sa Danao Police station.

Si Pelare nga nahinabi sa Superbalita Cebu nagkanayon nga dungan ang ilang gipahigayong buy bust operation subay sa kampanya sa Oplan Limpyo Danao. Nakuha ang duha ka medium nga putos sa shabu ug laing 50 ka ka gagmay nga putos.

Sumala pa niini nga sila Si Quilaton, ug Angtud, nga pulos taga Brgy. Sabang, nakuhaan og tag 100 grams matag usa.

Ang drugas nga ilang nasakmit tanan sa mga dinakpan mokabat kinig P2,391,270 milyunes.

Sa dakbayan sa Talisay, tulo ka mga lalake nasikop sa human nalambigit sa ginadiling drugas.

Ang tulo didto masikop sa sitio Magay, Barangay Tangke, dakbayan sa Talisay niadtong miaging gabii.

Si Randy Pamat, 37, mao ang subject sa operation sa kapulisan.

Sa dihang gipahigayon ang buy bust operation, nibaligya si Pamat ug gidakop.

Lakip sa gidakop sila si Jomar Mamites, 27; ug si Jason Larita, 34, giingong mga drug user.