Sulad sa mga parojinog
Gipuy-ang langit sa mga Parojinog nahimong sulad sa dihang gipatay atol sa pagronda ni Ozamis City Mayor Reynaldo “Aldong” Parojinog sa Hulyo 30, 2017. Lakip sa gipatay ang asawa (Susan), anak Board Member Octavio, igsoon Mona ug laing 12. Nasikop ang mga anak Vice Mayor Nova Princess Parojinog- Echavez ug Konsehal Reynaldo Jr. Nakaikyas ang igsoong kanhi board member ug karon Konsehal Ricardo “Ardot”. DOJ mosang-at og kasong kriminal batok nila ni Nova Princess ug Ardot. Gikan sa pagka- untouchable nakab-ot ra gyud sa mga kamot sa balaod. Tulo na ka mayor ang gitumba nga naa sa drugs
watchlist ni Pres. Rodrigo Duterte sila si Mayor Rolando Espinosa sa Albuera, Leyte; Samsudin Dimaukom sa Datu Saudi, Ampatuan, Maguindanao ug Parojinog kansang amahan Ongkoy Parojinog maoy founder sa gikaintapang sindikato sa Kuratong Baleleng nga giihaw na sab. Apan dunay bersyon nga naunay sa gilabayng granada ang mga Parojinog atol sa sinukliay og buto-buto nga nanguna ang mga gwardya.
Ang pagkahugno sa gingharian nila ni Mayor Espinosa ug Parojinog naatol sa nadestinong hepe Chief Inspector Jovie Espenido hinungdan nga daghang naghangyo nga idestino sa ilang dapit aron mapuhag ang mga dagkong isda sa drugas. Andam si Espenido nga moatubang kon pasakaan siyag kaso. Tubag kini sa pagpanaway nga mga mayokmok lamang ang gilit-ag ug gilutos. Sila si Sen. Franklin Drilon ug Chiz Escudero inay modayeg sa kapolisan gikwestyon naman hinuon ang gihimong pagpangronda gamit ang unom ka mga search warrant. Si kanhi Pres. Noynoy Aquino mitambag nga ipa- review ang nahitabo sa mga Parojinog nonut sa pagpanaway nga walay nakitang kalamboan sa kampanya batok drugas ang administrasyon ni Duterte. Maayo pay maglana og potot si Noynoy.
Nunot niini nabanhaw ang pasangil batok sa negosyanting Peter Lim. DOJ miluwat og Immigration Lookout Bulletin Order batok nila ni Lim, Kerwin Espinosa, Peter Co, Marcelo Adolfo, Max Miro, Lovely Adam Impal Ruel Malindangan ug Jun Pepito. Si Lim gidus-an og sub-phoena nga paatubangon sa DOJ. Gipanghimakak gihapon ni Lim nga dili siya si Peter Lim alyas Jaguar, wala moangkon sa pasangil ni Kerwin nga siyay supplier sa drugas ug mihulagway nga dakong bakak ang gibutyag ni Marcelo Adolfo nga nag-abot sila si Lim sa Thailand uban ni Kerwin. Makalingkawas ba kaha si Lim sa tinudlo ni Duterte nga CIDG Chief Royina Garma? Gani si Lim nagppanghadlok na sa iyang seguridad.
Gumikan kay sayon ug dakong kwarta ang drugas daghang nagpadayon bisan nagkahulogan og peligro sa kinabuhi. Niay seryosong pasangil batok sa mga customs personnel nga kakonsabo sa sindikato sa drugas nunot sa P6.4B nga gi- smuggle sa nasod. Makatulog kahag maghayang si Customs Chief Nicanor Faeldon ning maong kontroberyal nga palusot?