Bitin nakit-an sa kisame sa balay
Natugaw ang pagmata sa mga molupyo sa Sitio Yoreco, Barangay Guadalupe, dakbayan sa Sugbo kagahapon sa buntag dihang adunay 20 ka tiil nga bitin nga diha sa kisame sa usa sa mga balay sa ilang silingan.
Si Barangay Peace and Security Officer Antonio Oran nihisgot sa SunStar Cebu nga ang bitin gitugyan kanila didto sa barangay hall mga alas 9:30 sa buntag kagahapon.
Matod ni Oran nga ang lalake nga tag-iya sa balay maoy nakabantay sa bitin human unom sa iyang mga iro ang nawagtang sa nagkadaiyang okasyon.
“Common naman na diri kay kinadak-an man gud ni na barangay ug naa pa gyuy dako na sapa. Hinuon, wa man gyuy napaakan sukad,” saysay ni Oran.
Ihatag sa barangay ang bitin ngadto sa City Command Control Center, nga mao usay mohatag sa mananap ngadto sa Department of Environment and Natural Resources 7.