Serbisyong medikal
Ang serbisyong medikal dili unta isipon nga tinubdan sa pagpanguwarta. Labaw nang dili mahimong negosyo sama sa pagtukod mga ospital. Kon pagpanguwarta ang nag-una nga konsepto sa medisina, klaro nga ang mga adunahan lang makaabot sa insaktong serbisyo. Ang mga doktor sa pagserbisyo kang bisan kinsa ug walay gipili. Tipik sa Hippocraic Oath nagkanayon: "... Into whatever houses I enter, I will go into them for the benefit of the sick, and will abstain from every voluntary act of mischief and corruption."
Apan sa dagan sa panahon sama sa dunay pagkatuis sa kawsa sa giilang amahan sa modernong medisina sa Kasadpan nga si Hippocrates.
Ang pagkadoktor usa sa mga propisyon nga pinangita karon ug daghang nahimong adunahan tungod sa kamahal na sa pagpatambal. Ang mga ospital usa sa mga adunahan estabilisemento bisan kadtong gipanag-iya sa mga relihiyusong grupo o foundation?
Sa pikas bahin, masabtan nato nga mahal ug dili bastabasta ang utok nga gipuga sa pagtungha sa medisina. Kasagaran gani nga makatungha niini dunahan usab. Komplikado ang kasamtangang kahimtang. Seguro, si Hiprocrates nagbangutan.
Isip unang lakang ug alibyo, dalaygon ang balaud nga gilagdaan ni Presidente Rodrigo Duterte nga nag-amendar sa Batasan Pambansa 702 aron pagdili sa pagdemanda sa ' deposits o advance payments' sa pagpaosptial ug ubang medikal nga kaso.
Ubos sa Republic Act (RA) 10932 nga gilagdaan ni Duterte niadtong Agusto 3, bug-at nga silot batok sa mga ospital nga dili moatiman sa pasyente nga walay ikadeposit nga kuwarta. Sumala sa Section 1 sa RA 10932, "request, solicit, demand or accept any deposit or any other form of advance payment as a prerequisite for administering basic emergency care to any patient."
Dili sa ingon nga dili kita mobayad apan kinahanglan unahon ang pagsalbar sa kinabuhi, kon mahimo pa.