Ang sapa sa Mahiga
Nunot sa pagbunok sa kusog nga ulan grabing baha ang nasinati niadtong Sabado sa gabii hangtod na sa pagka buntag.
Ang ubang dapit hangtod karon gisanapan pa gihapon sa tubig. Taas kaayo ang lanat sa ulan ug puwerte pa gyung kusoga mao nga niawas ang kasapaan nga naglikos sa Metro Cebu area.
Usa niini mao ang sapa sa Mahiga. Mao ni ang sapa nga nitadlas gikan sa uptown Cebu City ug nitadlas sa kabarangayan sa utlanan sa Mandaue City ug Cebu City.
Ang tumoy ning maong sapa mao nang bahina sa pier 6 sa Cebu City ug pier 7 sa Mandaue City. Sa miaging Biyernes, nikuyog ko ni Kapitan Rey Ompoc sa Mabolo pagsusi sa kahimtang sa sapa sa Mahiga nga nitadlas sa utlanan sa iyang barangay ug Barangay Subangdako habig sa Mandaue City.
Sa kadugay na natong hisgut ning sapaa kadto pa ko nakataak sa maong dapit. Nahimutang ni sa likod nianang mga bodega sa MJ Cuenco Avenue. Akong banabana mga tunga sa kilometro ang among gilakaw kilid sa sapa. Di na layo didto ang tulay nga nagdugtong sa Mandaue City ug Cebu City duol sa pier.
Gipakita ni Kapitan Ompoc nako ang upat ka nahabilin nga mga panimay gikan sa subra sa usa ka gatos nga gi- demolish sa nangaging ka- tuigan.
Tua pa ang mga kongkretong haligi nga giugbok sa sapa nga gisigaan na sab ug buak sa mga igsoon nato nga gustong makasapi sa mga kabilya hikan sa mga sementadong esteaktura. Sa ato pa upat nalang ka pamilya ang nahabilin didto.
Tulo nahimutang ni sa kilid sa sa sapa habig sa Mabolo ug ang usa habig sa Subangdako. Ang ilang katarungan nganong nagpabilin pa sila mao ang kakuwang sa pundo paghakot sa ilang mga butang. Dunay gustong mopauli sa probinsiya ug duna sa'y gusto nga mobalhin sa relocation site sa Barangay Paknaan sa Mandaue City.
Si Kap Rey nitanyag nga motabang og hakot aron mahingpit na ang paghawan sa maong dapit. Nindot ni nga kaugmaran pero sa akong tan-aw di pa ni ang hingpit nga kasulbaran sa baha. Kinahanglan pa nga hutdon ug hawan batok sa nahabiling mga estraktura nga naka-ali sa bul-og sa tubig. Ika duha kinahanglan pang palapdan ug palawman ang sapa basi sa rekomendasyon ni Kap Rey.
Akong banabana mga dulan sa usa ka kilometro ang trabaho nga angayang himuon karon dayon kon mahimo. Maghuwat pa ta ug duna na say mobalik pagpuyo didto? Usa ni sa bantayanan. Basin manurok daw uhong ang mga tigbayon didto unya'g mata nato sa buntag.