WARRIORS MILATOS SA WILDCATS, 60-39

Napahugtan sa University of San Carlos (USC) Warriors ang ilang paggunit sa liderato human nila gipangmakmak ang Cebu Institute of Technology University (CITU) Wildcats, 60-39, kagahapon sa Cebu Schools Athletic Foundation Inc. (CESAFI) basketball event college division sa Cebu Coliseum.

Ang Warriors ningposte sa ikatulo nilang sunodsunod nga kadaugan sa samang gidaghanon nga mga duwa aron ipabiling buhi ang ilang poruhan alang sa diretsong pagsulod sa finals.

Ang team nga wala’y pilde sa elimination round mao ang makadawat sa benepisyo nga automatic finals slot.

Ang Wildcats, nga nasugamak sa ikatulo nilang sunodsunod nga kapildihan, nakahatag pa og sikit nga engkuwentro sa tibuok 1st half. Igo ra nga naggukod ang Wildcats og duha ka mga puntos, 26-28, human sa halftime.

Sa pagpangulo nila ni Gabriel Araw-araw, Victor Rabat ug Malcolm Tan, ang Warriors nakapasutoy og sugod sa ilang opensa sa sayong bahin sa 4th quarter aron inaton ang ilang bintaha sa 50-37.

Dobleng kalipay ang nasinati sa USC gumikan kay hasta ang ilang manghod nga Baby Warriors mingdaog sab batok sa mas inilog nga University of Cebu (UC) Baby Webmasters, 64-61, sa high school division.

Sa laing sangka sa high school, gipangmakmak sa University of San Jose Recoletos (USJR) Baby Jaguars ang Southwestern University (SWU)-Phinma Baby Cobras, 78-69.

Samtang sa mga duwa niadtong Sabado, ninglampos ang mga iinlog nga University of the Visayas (UV) Baby Green Lancers ug defending champion Sacred Heart School-Ateneo de Cebu Magis Eagles batok sa tagsatagsa nila ka kontra sa high school division.

Gipangmak sa Baby Green Lancers ang Don BOsco Technological Center (DBTC) Greywolves, 89-68, samtang gipanglampornas sab sa Magis Eagles ang CITU Wildkittens, 78-55.

Ningdaog sab ang Cebu Eastern College (CEC) Dragons batok sa University of Southern Philippines Foundation (USPF) Baby Panthers. Sa nag-inusarang duwa sa college division, gipangkusokuso sa USJR Jaguars ang SWU Cobras, 103-88.