7th Mayor Alegado Cup sugdan, Sept. 9

Andam na ang tanan alang sa 7th Mayor Teresa “Nene” Alegado Fiesta Basketball Cup nga gikatakda mosikad karong Septiembre 9 sa Consolacion Sports Complex.

Sama sa miaging mga edisyon, tulo ka kategoriya ang kumbatihan ning usa ka bulan nga aksiyon nga gituyo aron pagdugang og lamas sa tinuig nga pista sa Consolacion agig pangilin sa minahal nilang patron nga si San Narciso unya sa Oktubre 29.

Kini mao ang midget (17-under), Sangguniang Kabataan o SK (18 ngadto sa 21 anyos) ug inter-barangay seniors (22-above).

Si league commissioner Paul Alelu Flores nagkanayon nga ang mga entranteng koponan gikan sa nagkadaiyang barangay sa nahisgutang lungsod bahino sa duha ka brackets.

Moduwa sila ubos sa double round elimination format diin ang top two matag bracket moabante ngadto sa crossover semifinals. Ang top seeds dunay twice-to-beat advantage. Ang mga mananaog magsangka dayon a tinagakay nga kampiyonato.

Ang torneyo karong tuiga gilantaw nga makakuha og dakong interes gikan sa mga batan-ong baskebolista sa Consolacion gumikan sa maanindot nilang salida sa 1st Governor’s Cup Under-21 Inter-Cities and Municipalities Basketball Tournament.

Nagdala sa pangan nga ‘Sarok Weavers’, ang Consolacion mikadlit sa labing makapakugang nga daog human ilang gipalukapa ang inilog nga Mandaue City aron pagsakmit sa North Division title.

Napakyas man tuod ang Sarok Weavers pagbira sa overall crown human mapilde sa Minglanilla Archangels.

Gipanglantawan ni Flores ang laing malampuson nga torneyo gumikan sa hugtanong suporta sa Consolacion LGU ubos sa liderato ni Mayor Teresa Alegado ug sa aktibong sports committee nga giangkobban nilang Roger ‘Roy’ Linaboc, Marilou P. Casul, Liking Caylan ug SB members Benjamin ‘Boy’ Tibon ug Vic Maglasang.