SIMBAHAN GITULIS; P400T NAWA

SCHOLAR SA SIMBAHAN SA MABOLO SUSPEK; STAFF GIBUNALAN SA TULISAN

Gitulis sa nagbinugtong nga tulisan ang opsina sa Saint Joseph The Patriarch Parish sa Barangay Mabolo, siyudad sa Sugbo niadtong Dominggo sa gabii.

Kapin sa P400,000 nga kwarta ang nakuha sa tulisan.

Matod ni Chief Insp. Jacinto Mandal nga pasado alas 6 kagahapon sa buntag nadiskobrehan sa sakristan sa simbahan ang pagpanulis.

Sa pagsaka sa sakristan aron ihatod ang kwarta nga koleksyon sa unang misa, iyang nakita ang staff nga kanhi madre nga nag buy-od ug nagkadugo na ang ulo ug nagpakitabang.

Dali ning gidala sa usa ka pribadong tambalanan kagahapon sa buntag tungod sa samad sa iyang nawong ug ulo.

Alas 10 pa sa milabayng gabii nahitabo ang pagpanulis sa dihang padung na nga isira ni Roxan Valmoria, 26, ang opesina dihang iyang nasugatan ang tulisan ug gikalitan siya pagsukmag niini.

Tungod sa kakusog sa pagsumbag, natumba siya ug dayon gikulata.

Nailhan sa kapulisan ang suspek nga wa lang una nganli nunot sa ilang gihimo nga manhunt operation ug nasuta nga inside job kini.

Ang maong tulisan, matod pa, scholar sa simbahan ug motabang usab og ihap sa koleksyon.

“The suspect has already

been identified. Usa siya sa mga scholar sa simbahan,” matod ni Mandal.

Sa imbestigasyon sa Mabolo police station ug pagsusi sa kuha sa close circuit television (CCTV) video, wa makuha ang insidente sanglit naa ra sa gawas ang mga camera niini.

Nagtuo si Mandal nga nasayod ang tulisan kon asa moagi nga disiya makita sa mga CCTV camera nga gimontar sa sulod sa simbahan.

Si Monsignor Alfredo Romanillos, team moderator sa St. Joseph Parish, nagkanayon nga di momenos sa P400,000 ang nakuha sa tulisan gikan sa steel cabinet nga maoy koleksyon sa sam-ang nga ilang gidumala nga wala pa nila ma deposito sa bangko.

Tungod sa hitabo, mopahugot ang simbahan sa ilang siguridad aron di na kini masobli.

Samtang ipaubos usab sa imbestigasyon ang gwardya nga si Archie Ynot nga niadtong tungora maoy nagbantay sa simbahan.

Apan sa inisyal nga kasayuran sa Mabolo police, wa masayod si Ynot sa hitabo sulod sa opisina.

Si Sr. Supt. Joel Doria, hepe sa Cebu City Police Office, nimando sa Theft and Robbery Section nga palawman pa ang imbestigasyon. /

/ ARNI ACLAO ■ GiSuSi: Gisusi sa crime scene investigators ang mga butang aron pagkuha og ebedensya sa buhatan sa St. Joseph The Patriarch Parish sa Mabolo, siyudad sa Sugbo nga gitulis sa usa ka tawo niadtong Dominggo sa gabii.