P130K SHABU NASAKMIT

Kapin sa P130 mil nga gituohang shabu ang nasakmit sa high value target nga nasikop sa kapulisan sa dakbayan sa Mandaue atol sa ilang one-time big-time niadtong weekend.

Sakop sa sindikato nga drug group ang nasikop uban sa 19 ka mga tawo nga nalambigit sa iligal nga drugas samtang dakpan sab ang laing upat ka mga tawo nga nalambigit sa pagpangawat sa nagkadaiyang operasyon.

Si De Paul Basa alayas Popoy, 38, gituohang miyembro usab sa Sadaya Drug Group nakuhaan og 11.28 gramos sa shabu nga gibanabanang mokabat ngadto sa P133, 104.

Gawas sa gidiling drugas, nakuha usab gikan sa suspek ang usa ka .38 revolver, ug motorsiklo. Kini na ang ikatulong one-time

big-time nga operasyon sa Mandaue City Police Office sud lang ning buwana diin di mominos sa 60 ka mga tawo nga nalambigit sa iligal nga drugas ang nasikop sa nagkadaiyang operasyon.

Sayo ning buwana, lima ka tawo ang nakuhaan ug P7 milyones sa gituohang shabu diin uban sa grupo ang laing 40 ka mga tawo sa OTBN.

Gisundan dayon kini sa pagkasikop sa 20 ka mga tawo niadtong Agosto 8 diin usa ka gikatahapang pusher ang napatay sa operasyon human gituohang nisukol.

Samtang, mga suspek nga nalambigit sa pagpangawat mao sila si Nolito Alemes, 48, sa Sitio San Jose, Brgy. Labogon; Adrian Arda, 36; Rhamses Jay Tacumba, 21, parehong taga Sitio Fatima, Brgy. Jubay, Liloan; ug Rey Elada Villaflor, 44, taga Dumaguete City.

Nasikop si Aleme human gipasanginlan ni Maria Divina Lesiorna ug pagpangawat sa mahalong gadgets, relo ug tsinelas nga mokabat og P13,200.

Si Arda ug Tacumba sa laing bahin, gidakop atol sa entrapment operation human nangilkil ug kuwarta ni Jane Thea Pulvera, 22, taga Cogon, lungsod sa Liloan.

Ang mga suspek giingong nibahad nga iupload ang hubo nga hulagway ni Pulvera sa internet maong kini nakipagkita sa usa ka mall sa Brgy. Centro.

Nasuta ning mantalaan nga si Villaflor nang- snatch ug kwarta gikan ni Isadora Franza, 44, taga Brgy. Basak.

Maayo nga nakapangayo ug tabang si Franza sa traffic enforcer duol sa ilang barangay maong nasikop ang suspek nga si Villaflor.