SINGLE MOTHER ‘MIHARI’
Ang kayang buhaton sa mga lalake mabuhat usab sa mga babaye.
Gipamatud-an kini sa usa ka 23-anyos nga single mother ug police recruit nga nag-top sa unom ka buwan nga basic public safety course aron mamahimong pulis.
Bag-ong panganak pa lang si Lucille Waminal Alado sa dihang nakadisider siya nga mopaubos sa maong pagbansay.
Siya ang top 1 sa 389 ka Police Officer (PO) 1s sa Class Ephesians uban ni Grace Irene Diwan nga nigradwar sa milabayng semana sa Camp Jessie M. Robredo, headquarters sa Regional Training School 7 sa Barangay Jugan, Consolacion.
Si Alado ug Diwan parehong nakakuha ug 92.25 nga grado.
“Tuon lang gyud bisan pag way tarong tulog basta tuon lang gyud. Maminaw sa klase, di patulogtulog,” ni Alado.
Matod ni Alado nga ang iyang kalampusan iyang gihalad sa iyang usa ka tuig na nga ba - tang babaye u g iyang inahan nga iyang inspirasyon sa kon unsa ang iyang nakab-ot karon.
Dugang ni Alado, kinsa lumad sa Gingoog City, Misamis Oriental nga wa siya makakuha sa suporta sa iyang ginikanan sa buot niyang buhaton niadto tungod kay bag-o lang siyang nanganak.
Iyang gihimugso iyang anak Nobyembre 25 sa milabayng tuig.
KAYA SA MGA BABAYE
Saad ni Alado nga kon hingpit na nga mahimong pulis gukdon gyud niini ang mga kriminal ug di magpadala sa kwarta sa mga drug lord kon kini magsugod na sa iyang sebisyo.
“As a public servant, I will do my best to serve the public in the
right way,” ni Alado. Siya usa ka gradwado sa kursong Education gikan sa Lanao School of Science and Technology Inc.
Sukad sa elementarya, subsub si Alado sa iyang pagtuon ug kunanayng gisuguro niini nga dagko iyang grado aron maproud iyang inahan, apan pakyas siya nga mahimong honor student pag-kolehiyo tungod kay usa siya ka transferee.
Human sa public safety course, ipaubos sa field training program ang tanang police recruit nga nagkinahanglan nila nga magpatrolya sa kadalanan.
Laing mga pagbansay ang pagabuhaton usab human sa ilang field training nga molungtad og buwan.
Human sa tanan niining training pagka-pulis, plano ni Alado nga mokuha ug kursong Law aron mahimong manlalaban.
“Plano ko nga mag- proceed ko og Law kay aron makita nako unsa gyud diay ang balaud.
As a law enforcement officer, dapat well- versed ko sa balaud for me to be able to really implement the law,” dason pa ni Alado. Atol sa graduation, nahingangha si Chief Supt. Jose Mario Espino, direktor sa Police Regional Office 7, nga mga babaye ang mga nanguna sa klase. “Bisan pa og mga babaye mi, kaya namo buhaton ang mga kaya sa mga lalake,” pasigarbo ni Alado vsa mga tigbalita. /