Suroy-suroy sa Siquijor

Bisan sa ka-busy sa atong trabaho sa tri-media nakalighot gihapon kita sa bakasyon bisan sa hamubo lang nga panahon. Nagkasabot kaming nga higala nga moadto sa lalawigan sa Siquijor gumikan sa imbitasyon ni Siquijor Provincial Police Office (SPPO) Director S/Supt. Erson Digal. Dugay na kining maong imbitasyon ni Digal sukad pa siya nahimong provincial director sa maong lalawigan mga duha na ka tuig ang nakalabay.

Uban sa among grupo mao si Atty. Eddie Barrita, Raul Laurente, Banat News editorLucky Malicay, businessman Rod Ngo, Marit Stinus Cabugon, Bong Lintag ug Bennex Catigbak sa PLDT, Barili Councilor Julie Flores ug mini bus operator Joseph Kong. Apil unta nako si komentarista Choy Torralba apan mibalibad ultima ora.

Dali ra ang pagbiye sa mga silinganang lalawigan sa Sugbo gumikan sa mga barge ug roro nga mokarga gani og mga sakyanan. Migikan mi sa Liloan, Santander port mga alas 10 ug miabot kami sa Larena pasado alas 12 sa udto.

Pag-abot namo sa Larena giabi-abi kami ni Col. Digal ug ni DPWH District Engineer Elvis Calunod. Una namong nabisita mao ang Triad Restaurant nga nahimutang sa ibabaw sa bukid sa Larena, overlooking the sea nga gipanag-iya sa akong kababayan nga taga Zamboanga del Norte nga sila si Doctors Pantaleon ug Elena Masayon. Didto kami naka- check in sa Fun-ta-sea Beach resort sa Siquijor town. Naka- courtesy call usab kami ni Gov. Zaldy Villa.

Gilangkuban ang lalawigan ug unom ka mga munisipalidadnga mao ang Larena, Siquijor, San Juan, Lazi, Maria ug Enrique Villanueva nga mao kanhi ang Talingting.

Katapusan nakong nakataak sa maong lalawigan mga 30 ka tuig na ang nakalabay. Niadtong batan-on pa ako, ako ang mo-escort sa akong lola nga mamista sa Larena unya magpabolo-bolo siya. Karon akong na-obserbahan ang kalambuan sa lalawigan sa natad sa ekonomiya. Daghan ang mga patigayon sama sa mga beach resort ug ingon man nindot na kaayo nga mga dalan ug infrastructure. Tourism ang gi-promote sa lalawigan.