Mensahe ni Duterte
Nakakuha og nagdaiyang reaksyon kining bag-ong giluwatang pamahayag ni Presidente Rodrigo Duterte kalabot sa iyang hugot nga kampanya batok sa gidiling drugas. Giangkon sa presidente nga lisod gyud ug usa ka dakong hagit sa iyang gobiyerno ang pagpakgang niining illegal nga drugas nga grabi nang mikatap sa nasod.
“Hindi makaya nga ng iba, tayo pa kaya? Iyong drugs na iyan,we can’t control it,” matod ni Duterte atol sa centennial celebration of the Southern Philippines Medical Center sa Davao City.
Gani iyang gibasehan nga bisan ang Amerika nga adunay sakto sa teknolohiya wa makapakgang niini, unsa pa kaha ang Pilipinas.
Unsa may mensahe nga buot ipasabot sa Presidente? Sabton ba nato nga miabot na ang panahon nga milubad na siya sa iyang kampanya batok sa illegal drugs nga maoy nakapakabig sa kinabag-an aron ibutang siya sa maong puwesto?
Duna bay kalambigitan kining pamahayag sa presidente ning alegasyon nga pagkalambigit sa iyang anak nga si Davao City Vice Mayor Paolo Duterte sa nabulgar nga P6.4 billion nga kantidad sa shabu nga gipalusot diha sa Bureau of Customs?
Di nato kalikayan nga kining bag-ong giluwatang pamahayag sa Presidente nakahatag og pakunsuylo sa mga drug personalities ilabi na niadtong mga nagpadayon sa ilang ilegal nga negusyo hangtod karon.
Dunay tukmang mensahe nga gustong ipaabot si Duterte ngadto sa publiko, apan usa ka butang ang labing siguro.
Dili yanong talikdan sa presidente ang butang nga iya nang nasugdan ug hugot nga gisuportahan sa mga tawo. Anaa na kaniya ang momentum ug dili angay nga iya kining lugakan pa.
“I have to stop drugs, really stop. And it will stop. I will defend and protect the Filipino nation. Period,” matod sa iyang unang pamahayag sa niaging buwan.