Di undangan og kiha sa kontra
MRP. Gipadalhan ko ni Surigao del Sur Second District Cong. Johnny T. Pimentel og press release nga ang Mindanao Railway Project ( MRP) nahatagan na og P6.58 bilyunes nga pundo aron masugdan na ang train nga proyekto sa Mindanao.
Matod ni Congressman Pimentel ang MRP usa ka dako nga proyekto sa DOTr nga nagkinahanglan og dako nga pundo. Sa P6.5 bilyunes nga pundo masugdan na ang Phase 1 sa MRP nga modagan og 105 kilometros nga mokonektar sa Davao del Norte, Tagum City, Davao City, Davao del Sur, ug Digos City.
Inig gkahuman sa probinsya sa Davao, ilahus ang railway ngadto sa dakbayan sa Butuan, Cagayan de Oro, General Santos, Iligan, Surigao ug Zamboanga.
Mao ni proyekto nga si Presidente Duterte di mahikalimtan kon makumpleto ni sa di pa matapos iyang termino.
Apan dakong sagubangon sa magbubuhis kay ang 2,000 kilometros nga railway mokostar og P120 bilyunes. Sa Phase 1 pa lang P36 bilyunes ang magasto. Pero di na ko igsapayan ang dako nga balayronon basta mahuman ang MRP ug makaserbisyo sa katawhan.
KIHA. Dili undangan si Cebu City Mayor Tomas Osmeña sa iyang mga kontra sa pulitika og kiha. Nag-atubang karon og ika-upat nga kiha si Mayor Tomas sa Ombudsman tungod sa iyang hulga nga bakwion ang nabaligya nga mga lote sa SRP.
“Grave misconduct, conduct prejudicial to the best interest of service and conduct unbecoming of a government employee” ang kiha batok ni Mayor Tomas ug ni City Treasurer Tessie Camarillo sa Ombudsman nga gipasaka ni Apas Brgy. Capt. Ramil Ayuman niadtong Biyernes.
Giapil si City Treasurer Camarillo sa kiha tungod kay gimandoan siya ni Mayor Tomas nga dili ipadawat ang bayad sa SM ug Ayala nga maoy nakapalit sa lote sa SRP niadtong sa panahon ni kanhi Mayor Mike Rama.
Matud pa ni Ayuman, ang dili pagdawat sa bayad sa nakapalit sa mga lote sa SRP usa ka “economic sabotage” tungod kay di magamit ning maong pundo alang sa serbisyo sa publiko.
Gani, ang rason nganong daghan ang basura sa kadalanan gikan sa kabalayan kay walay pundo nga ikabayad sa paghakot ug sa tipping fee sa paglabay niini ngadto sa landfill sa Consolacion.