LANCERS 2-0 TIRADA

Mga duwa karon 5:15 pm- SHS-AdC batok DBTC ( jrs) 6:45 pm- UV batok USPF (srs)

Langkaton og suway sa defending champion University of the Visayas (UV) Green Lancers ang ikaduha nilang sunodsunod nga kadaugan sa ilang pagpakigbatok sa University of Southern Philippines Foundation (USPF) Panthers sa main game karong gabii sa Cebu Schools Athletic Foundation Inc. (CESAFI) basketball

college division sa Cebu Coliseum.

Human nasubhan og 73-78 nga kapildihan batok sa University of San Carlos (USC) Warriors niadtong Agusto 6, ang Green Lancers ni coach Gary Cortes ningbangon ug namungot sa University of Cebu (UC) Webmasters, 72-61, niadtong Dominggo.

Sama sa Green Lancers, ang Panthers ni coach Albert Alocillo naghupot sab og 1-1 nga rekord.

Nabunyagan ang Panthers og dakong kadaugan batok sa Cebu Institute of Technology University (CITU) Wildcats, 8272, niadtong Agusto 6.

Apan sa ikaduha nilang tahas, ang Panthers nakatilaw og kastigo batok sa Warriors, 5783, niadtong Agusto 10.

Tataw nga mas lig-on ang puwersa sa Green Lancers apan kon molugak og gamay ang ilang duwa, puwede kining mapahimuslan sa Panthers aron makakulit og makapakugang nga kadaugan.

Sama sa naandan, ang Green Lancers magsalig na sab og insakto nila ni Tristan Albina, Jerome Napao, import Bassieru Sackor, Josue Segumpan ug Rey Suerte.

Sa ilang bahin, ang Panthers mosandig sa abilidad nila ni John Allain Alocillo, Edwin Villarta, Lyndon Colina, Mike Patalinghug, Lugie Cuyos ug import Rich Managor.

Sa premirong duwa, angkunon og suway sa Sacred Heart School-Ateneo de Cebu (SHS-AdC) Magis Eagles ang solong liderato sa high school

division sa ilang pagpakigbatok sa Don Bosco Technological Center (DBTC) Greywolves.

Ang Magis Eagles adunay 2-0 nga rekord ug kasamtangang nakigbahin sa University of San Jose Recoletos (USJR) Baby Jaguars sa ibabaw nga bahin. Ang Greywolves adunay 1-1 nga baraha.