GILAS HAROS SA GROUP B
Japan o Korea maoy ikasangka sa knockout stage
Gipasalig ni Fil-German Christian Standhardinger nga moduwa siya sa tahas sa Gilas Pilipinas sa knockout quarter-finals sa FIBA Asia Cup sa Lebanon ugma bisan magsakit pa ang iyang liog ug abaga.
Wala moduwa si Standhardinger sa katapusang tahas sa Gilas sa group elimination batok sa Qatar niadtong Dominggo gumikan kay grabe ang gibati niyang sakit sa iyang liog ug abaga.
Bisan wala si Standhardinger, Calvin Abueva ug JuneMar Fajardo, ang Gilas nakamaneho gihapon pagpukan sa Qatar, 80-74, aron haruson pagdaog ang tulo ka mga tahas niini sa Group B.
Naangol ang tiil ni Abueva sa 2nd quarter batok sa Qatar ug wala na kini makabalik og duwa samtang si Fajardo padayon pang nagpaalim sa angol sa iyang bagtak nga iya nag nasinati pipila ka mga adlaw sa wala pa nagsugod ang FIBA Asia.
Gipasabot ni Standhardiger nga aduna pa gihapon siya’y gipamating sakit sa iyang liog ug abaga sa kasamtangan apan iyang gipaneguro nga dili kini makapugong kaniya sa pagduwa sa quarter-finals.
Sa quarter-finals, ikaharong sa Gilas ang midaog tali sa Japan ug South Korea nga padayon pang nagsangka kagabii sa presstime.
“No matter what, pain or no pain, I will play on Wednesday when it really counts,” asoy ni Staandhardinger sa video message nga iyang gi-post sa social media.
“We need to take care of every opportunity to be better. I needed to do what I can be to be 100 percent and to help the team as much as I can.”
Gitataw ni Standhardinger nga gibati na siya og sakit sa wala pa siya miabot sa Manila ug migrabe lang kini sa kadaugan sa Gilas batok sa Iraq, 8468, nga maoy ikaduhang tahas sa mga Pinoy sa FIBA Asia. “Somebody hit me in the game, somebody hit me in the back and I heard it pop,” batbat ni Standhardinger. “And since then, I felt a lot of pain moving.”
Sa kadaugan sa Gilas batok sa China ug Iraq, si Standhardinder nag-average og 15.5 puntos ug 6.5 rebounds.