7 BARANGAYS MO-CURFEW
UBOS SA POLICE STATION 6 KAY MGA MENOR GIGAMIT SA MGA DURUGISTA
Pito ka mga barangay sa syudad sa Sugbo nga grabeng naapektohan sa illegal nga drugas mopatuman na sa curfew ordinance sa Siyudad aron mahipos ang mga menor de edad nga gigamit sa illegal nga kalihukan.
Ang mga barangay nga mopatuman sa curfew hour sugod ning semanaha, naglangkob sa Sawang Calero, Pasil, Suba, Pahina San Nicolas, San Nicolas Proper, Calamba ug Duljo Fatima.
Matod ni Kapitan Ariel Yburan sa Sawang Calero nga kasagaran sa mga nalambigit sa illegal nga drugas sa iyang lugar mga bata nga gigamit sa pagpamaligya sa mga drug personalities.
Apan di mahimo nga ang iyang barangay lang ang mopatuman niini.
Kinahanglang moapil ang iyang mga silingang barangay kay mahimong modagan lang sa pikas eskina ang bata aron di masikop.
Kon hingpit nga mapatuman ang curfew, wa na unyay mga bata nga makita sa kadalanan gikan sa alas 10 sa gabii hangtod sa alas 4:30 sa buntag.
“Dili man pareha kaniadto nga mga dagko ang mamaligya og drugas. Karon gigamit na ang mga minors. So, para lang mapugngan namo, mag koan tag curfew mao nang naa diri ang mga barangay captain sikbit ra man ang mga barangay,” matod ni Yburan.
Lakip sa idili sa curfew hour ang pag inom-inom sa gawas ug ang paghukas-hukas samtang panghiposon ang mga nangatulog sa asiras.
Gihangop ni Sr. Supt. Joel Doria ang plano sa mga kapitan nga sakop sa Station 6 sa CCPO sanglit usa ni sa makatabang sa ilang kampanya batok sa illegal nga drugas.
Gipaabot nga mokunhod usab niini ang krimen sa usa ka barangay.
Samtang gihatagan og upat ka mga close circuit television camera ang Station 6 sa usa ka pribadong kompaniya sa syudad sa Sugbo.
Gipangmontar ang maong mga camera sa sulod sa police station aron mamonitor kining mga pulis nga wa magtarong sa ilang trabaho.
Gawas niini mahimo usab nga mabantayan ang mga panghitabo sa tibuok barangay Sawang Calero human gitugotan ni kapitan Yburan nga maka monitor ang station 6 sa video feed gikan sa 16 ka mga camera nga gipakatap sa kadalanan sa barangay. /