GRECO GIKATAKDA NGA MOPIYANSA
Temporaryo na unyang gawasnon ang una nang gihulagway sa kapulisan nga high-value target, nga si Leodegreco Sanchez, sa higayon nga makapiyansa kini sa mga kasong iyang giatubang, subay sa pagkasikop sa miaging buwan.
Si Greco, anak ni kanhi Bise Gobernador Gregorio Sanchez ug igsuon ni kanhi bokal, Grecilda “Gigi” Sanchez.
Lakip sa gipasakahan og kaso ang iyang kapuyo nga si Maricel Gregory nga gitumbok nga maoy nakuhaan sa usa ka sachet sa giingong shabu nga nagtimbang og 0.16 gramos.
Ang Cebu Provincial Prosecutor’s Office nirekomendar pagpasaka na sa mga kasong kalapasan sa Section 12 sa Comprehensive Dangerous Drugs Act ug kalapsan sa Section 28 sa Comprehensive Firearms and Ammunition Regulation Act.
Niadtong Hulyo 29, gironda sa kapulisan ang panimalay ni Sanchez sa Barangay San Juan, Tuburan ug nakuha gikan kaniya ang mga gamit sa pagsuyop og drugas nga naglakip sa duha ka dagkong rolyo sa tin foil, upat ka mga lighter, duha ka improvised burner, duha ka tooter ug usa ka kum-ot ug daw ginamit na nga tin foil.
Nakuha sab gikan kaniya ang usa ka bala sa 5.56 caliber nga armas.
Si Fiscal Liewellyn Bonghanoy nirekomendar pagsang-at na sa mga kaso batok ni Greco ug Gregory ngadto sa Toledo City RTC. Gi-aprubahan sab kini ni Provincial Prosecutor Pepita Jane Petralba.
Sa kasong ilegal nga paghupot og bala, girekomendar ang P80,000 nga piyansa samtang P40,000 sa kasong paghupot og drug paraphernalia.
Samtang sa kaso ni Maricel Grecory, P200,000 ang girekomendar nga piyansa.
Napasakaan na usab og kasong paghupot og drug paraphernalia ang bata-bata nila nga si Glenn Nacion, nga nasikop sab sa operasyon.
Samtang katong lalaki nga giingog nisuway pagpaikyas nilag Greco ug kaubanan human niabot ang mga pulis, gipasakahan sab og kasong kalapasan sa PD 1829 o mas naila nga obstruction of justice.
Ang akusado nga si Jolbert Jacaba, girekomendar nga pabayron og P12,000 alang sa iyang temporaryong kagawasan. /