Stop order gisilbi sa Dole sa Realty Star Development Corp.
Gisilbi na sa Department of Labor and Employment (Dole) 7 ang stoppage order batok sa Akropolis Realty Star Development Corporation, ang building diin nahug ug nakalas ang usa ka 19-anyos nga construction worker niadtong Lunes sa hapon.
Kagahapon sa buntag dihang gipatuman sa DOLE 7 ang stoppage order sa kadagkoan sa building, subay na usab sa nakita nga kalapasan sa Labor Laws Compliance Officer (LLCO), nga nahimutang nga dan Sanciangko eskina Leon Kilat, dakbayan sa Sugbo.
Base sa stoppage order ug sa pakisusi sa duha ka LLCOs nakita nga sa 16th floor nahug gikan si Nidfel Soco, usa ka kawani sa Kapar Waterproofing Services, sub-contractor sa Dakay Construction and Development Corp., ang general contractor sa proyekto.
Matod ni Dennis Lim, kauban sa trabaho ni Soco, nga human sa ilang paniudto nisaka si Soco sa 16th floor aron mohimo sa waterproofing sa parte sa andana.
Giingon nga wa magsul-ob og personal protective equipment (PPE) lakip ang harness diin mao kini ang posible nga rason nga nahug siya ug namatay.
Lakip sa nakita nga kalapasan sa Occupational Safety and Health Standards General Labor Standards kining way safety barrier sa 15th floor.
Way permit sa system alang sa cold works sama sa waterproofing, way safety officer, way safety harness ug uban pa.
Nakita usab nga adunay kalapasan sa General Labor Standards susama nga way benefits ang mga trabahante alang sa SSS, Philhealth, Pagibig ug leave benefits.
Sa pagkutlo ning balita, gihimo ang mandatory technical conference sa kadagkaon sa kompanya ug sa contractor sa proyekto.