Sungag sa pribadong hospital

Ang mga kabos nga way health insurance may dako nag purohan nga maluwas sa ilang grabeng sakit kay dawaton na sa mga pribadong hospital bisag way ikahatag nga deposito.

Kini ang gimbut-an sa Republic Act 10932 nga nag-amendar sa R.A.702 nga silutan ang hospital nga maningil og deposito sa mga pasiyente. Multa ug bilanggo ang ipahamtang sa makasupak.

Ang kawani sa hospital kon maoy maningil, 6 ka mga buwan ngadto sa 2 ka tuig nga bilanggo ug multa og P100,000 ngadto sa P300,000. Tiamo na kakuyaw masilutan ang nagtanghal nga kawani.

Kon maoy patakaran silutan ang tag-iya o tagdumala sa hospital sa mas grabe-grabe nga silot sa 2 ngadto sa 6 ka mga tuig nga bilanggo ug multa og P500,000 ngadto sa P1,000,000.

Tagam! Ang hinguwarta nga hospital ug buringog nga kawani. Panalipod ni sa mga dinaugdaog nga kadaghanan mga kabos ug timawa. Apan ang pangutana mao wa man ganiy ikadeposito bayad pa kaha?

Way kuwestiyon tong makaabot naatol lang nga way ikadeposito. Anhi dinhi makuwenta ang alkanse sa hospital nga usa ka negusiyo. Kon way ikabayad ang mga pasiyente, bangkrap ang hospital.

Dinhi na mohunahunag kaduha ang buot motukod og hospital sa umaabot. Ganansiya ang tumong sa negusiyo di libreng pangalagad. Moabot ang higayon nga magkawagtang na ang mga pribadong hospital nga hinguwarta.

Kini ang angayng pangandaman sa atong kagamhanan ang libreng hospitalization sa mga kabos. Naa tuod tay mga hospital sa kagamhanan, kakuwang niini sa mga bag-ong kahimanan ug tambal. Samot kay pabayad pa morag pribado.

Atimanon unta ang mga pobreng makaluluoy sa kagamhanan di kay mangligdas lang ug mamatay. Imbes kurakuton lang ang pundo nganong wa may libreng hospitalization sa mga kabos?

Sayri Kini. Ang Bathalad, Sugbo, pundok sa mga magsusulat sa rehiyon 7, 48 anyos na karong Agusto 19. Usa ka ligon nga literary movement sa 60's-80's, nahimong pormal nga asosasyon sa 1989. Nagpakatawo sa Bathalad Mindanao sa 1994. Kudos!