Makatabang kaha ang igsuon ni Andy?

akyas ang plano sa ubang mga kongresista nga ilang galingon sa mga pangutana si Comelec Chief Andres 'Andy' Bautista bahin sa mga gipang-akusar kaniya sa iyang asawa atol sa hearing sa Committee on Suffrage sa ubos balay-balauranan kaniadtong Lunes.

Wa motungha si Bautista sa maong hearing.

Apan bisan kon wala si Bautista, mipalabang gihapon og resolusyon ang mga magbabalaod nga nag-suspende sa SK ug Barangay elections og ibalhin na kini ngadto sa Mayo 8 sunod tuig.

Buot ipasabot, padayon ang paglingkod sa mga opisyal sa barangay ug walay piniliay nga mahitabo karong bulan sa Oktubre.

Kining maong panghitabo naghatag og dugang pagduda sa mga tawo nga dunay paglahogay nga mahitabo sa mga opisyales sa barangay.

Daghan ang nagduda nga mao kini ang mahitabo sanglit mitataw man si Presidente Rody Duterte nga pinasubay sa iyang kampanya sa druga, angayan nga dili idayon ang piniliay kay gamiton lang ang kwarta gikan sa gidling druga aron modaog ang mga piling opisyal.

Kasagaran sa mga opisyales sa barangay namatud-an nga dunay kalambigitan sa druga.

Kon pasagdan kini sila nga modagan sa piniliay nga pagahimoon, seguradong modaog lang gihapon sila sanglit duna man silay daghang kwarta nga magamit sa piniliay.

Tungod niini, daghan ang nagtuo karon nga dunay mahitabo nga pagtudlo sa mga OICs o caretakers nga maoy mopuli sa mga kasamtangan nga opisyal sa barangay.

Daghan usab ang nagtuo nga ang DILG maoy motudlo sa mga OICs nga magsilbi nga caretaker sa pamunoan sa mga barangay. Apan dunay pangutana. Kinsa man ang mohatag sa mga ngalan sa mga OIC nga itudlo?

Siyempre, dunay kalambigitan sa pagtudlo sa mga OIC si PRRD sanglit siya man ang nangulo sa kampanya batok sa druga.

Angayan gyod nga siya ang mangunay sa pagpili sa mga OIC.

Apan kinsa man ang iyang saligan sa pagtudlo sa mga OIC sa mga lalawigan sa tibuok nasod?

Mao kana ang pangutana nga nagtangag og dakong tubag.

Nagkalami ang kaguliyang karon tali kanila ni Andy og Patricia Bautista.

Miapil na gyod ang igsuon ni Andy nga si Martin nga usa ka doktor sa US sa dugay na nga panahon.

Miangkon si Martin Bautista nga treasurer sa ilang pamilya si Andy ug maoy nagdumala sa ilang negosyo sa pamilya.

Daghan pa siya og pamahayag nga gibuhian isip apil sa iyang plano nga labanan ang kahimtang karon sa iyang igsuon.

Apan dunay dakong pangutana.

Nakatabang ba kini sa kawsa ni Andy Bautista?

Mao kana ang dakong pangutana sanglit mahimo man nga gamiton ang iyang gipanulti batok sa iyang manghod nga si Andy.

Kon miangkon siya nga duna silay daghan nga mga negosyo nga gisudlan didto sa US nga gidumala ni Andy, nagpasabot lang kini nga dunay mga papeles nga magmatuod niini.

Pananglit, ang papeles gikan sa Internal Revenue Service (IRS) sanglit ang tanang negosyo sa US moagi man gyod sa IRS para sa ilang buhis.

Kon kuhaon ang mga dokumento sa IRS, makita dayon kon tinuod ba o bakak ang gipanulti ni Martin Bautista.