Dawaton ko ba?

Dear Papa Joe,

Tawga lang ko sa ngalan nga Joan, 30 years old. Buwag mi sa akong bana kay lagi adik sa sugal. Naa miy anak duha ka buok ug ako ang nagbuhi nila pero maghatagan man sad akong bana pinaagi sad sa hatag sa iyang mga ginikanan.

Ganahan na ko nga ma formal among panagbuwag para makakaplag gyud ko og tinud-anay nga gugma. Pero unsaon man nga mahal ang annulment. Karon, nisamot akong ka gusto maka hinigugma dihang nahimamat nako akong ex nga love baya nako sauna pero wala mauyoni ni mama kay pobre. Pero karon, datu na ug usa na ka politician. Annulled ang ilang kasal sa iyang asawa ug gusto siya nga magkabalik mi kay dugay na kuno siya nangita nako.

Mao ni akong suliran karon kon dawaton ba nako ni siya og balik nga minyo paman ko. Love baya nako akong bana sad kay naa baya miy mga anak. Palihug tambagi ko.

JOAN

Joan,

Basin mao na na ang tubag sa imong gipangayo nga true love nibalik. Pero kinahanglan nga plantsahon sa nimo ang tanan kay lisod na og mabulyaso. Pero wa ko magingon nimo nga biyae ang imong bana. Ang pagplantsa mao nga hunahunaon ug planuhon nimo ug tugkaron nimo ang tanang pangutana nimo about sa inyong sitwasyon karon. Kon naa ba gyuy hope, nga di magdako ang imong mga anak nga samok ang pamilya.

Ang pag ampo gyud, Joan, ang makahatag nimo og maayong tubag. Di man diha-diha dayon pero makita nimo ang padulngan niini sa hinayhinay. Ayaw lang gyud pagdali-dali sa desisyon. Kana lang ug daghang salamat.

PAPA JOE