Taym sa, Madam Martinez
Misanong si Martin sa gusto ni Madam Martinez. Gipul-an na siya sa kanunayng pasabot sa pasiklap niini kanang magtigom sila sa ilang pundok sa mga magsusulat sa Sugbo.
Usa ka hapon niana human sa ilang tigom miduol kini kaniya nga nagburdag tamis kaayong pahiyom ang mga ngabil.
“Unsa na, Martin, are you okey of my proposal?” matod ni Mrs. Martinez.
Gibawsan niyag pahiyom ang bantugang magsusulat sa Sugbo kay kanunayng modaog sa Palanca. Sama niya wa na kiniy kapikas sa kinabuhi. Edaran na kini apan miluta gihapon ang katahom sa pamayhon. Wa mangunot, hamis gihapon ang pamanit. Bag-o pa silang duha nagkasuod kay ‘late bloomer’ siya sa panuwat sa dilang Sugbuanon. Siya ang kalihim ug si Madam Martinez ang mamahandi sa ilang pundok.
“I am not fresh nor a liberal woman, I am only frank and sexy.” Mitutok niya ang babaye sa tinutokan nga nagdag kahulogan sa tiunayng pagbati. Retired principal sa high school sa usa ka exclusive school for girls si Mrs. Martinez ug suma sa nahibaw-an ni Martin, usa kini ka Miss High School sa batan-on pa. “Tinuod nang imong proposal, Ma’m?” sukna niya sa babaye.
“Sure, I am not joking,” mipahiyom niya si Mrs. Martinez.
Pagka ugma. Atubangan sa lubong sa iyang asawa nga si Liza dinhi sa sam-ang sa St. John, mikibot ang iyang baba. Samtang ang iyang kasang ingkasing nagpitik gihapon sa kamingaw sa linalang nga iyang gimahal hangtod ning mga gutloa. Lima na ka mga tuig nga siya gitalikdan ni Liza sa kalit nga disgrasya sa dalan. Nabangga sa poste ang iyang gisakyang mini bus nga drayber usa ka adik nga morag gipanuwayan sa iyang pagmaneho. Daghan ang nangamatay, usa mao si Liza.
“Liz, nia ko arong mananghid nimo. Gidawat ko na ang proposal ni Mrs. Martinez human sa daghang adlaw sa paghinuktok. Di kay nakalimot na ko sa akong saad kanimo. I still love you ug gipangga ko ang atong mga anak.”
FUENTE OSMENA. Molabang na unta siya padung sa iyang adtuan dihang may misangpit niya. Si Marcelo, ang ilang pamuno. Mihunong siya.
“Bay, di mahinayon ang atong meeting sunod buwan kay moadto ko sa Manila. Ipahibawo lang unya sa tanan,” ni Marcelo nga nagdaling mitalikod human mopikpik sa iyang abaga
May gipanghinol siya sa iyang duha ka bulsa, wa ang iyang ‘power-ego’ sa pagka lalake. Nawa o nalimtan? Sa unahan nalantaw niya ang usa ka botika nga iyang suki. Unya may mihunong nga sakyanan. Miabli ang bentana sa awto nga si Madam Martinez ang sakay.
“Sakay na diri, Martin. Diretso na ta didto,” agda ni Madam Martinez. Nakita niya nga nag- make over kini. Misamot kalutaw ang kahamis sa nawong niini.
“Taym sa, Ma’am, kay duna pa koy paliton. Sunod lang ko,” matod niya.
Misirit ang matahom nga awto sa biyuda nga matod pa ni Marcelo, asawa kanhi sa milyunaryong Insek ug wa kini silay anak. Nagpanglingo ug nagpanglad-ok siya nga naghunahuna sa proposal ni Mrs. Martinez nga iyang gidawat.
(KATAPUSAN)