GOOD LUCK, JOY
Human sa mabungahon niyang training sa gawas sa nasod, ang Cebu marathonder Mary Joy Tabal andam na alang sa iyang kampanya sa 29th Southeast Asian (Sea) Games marathon event karong Agusto 19 sa Kuala Lumpur, Malaysia.
Ang no.1 athlete sa Motor Ace Kawasaki Racing Team mogikan karong adlawa paingon sa Malaysia kauban ang dugay na niyang coach nga si John Philip Dueñas, kinsa maoy magsilbi niyang personal coach sa matag duha ka mga tuig nga kompetisyon. Ang opisyal nga PHL team distance running coach mao si Rene Herrera.
“My training went well and my coach (in Italy) always says that I’ve improved so I’ll take it from there. I won’t say that I’m confident but yes I’m ready. I didn’t train this hard for nothing so I
have to do my best,” asoy ni Tabal sa SunStar Cebu, igsuong buhatan ning mantalaan.
Gituldokan sa lumad nga taga brgy. Guba, Cebu City ang iyang tulo ka mga buwan nga training sa Tuscany Training Camp sa Italy sa sayong bahin ning buwana.
Ang kanhi sprinter sa Southwestern University (SWU) miagi sab og high altitude training sa St. Moritz sa Switzerland sulod sa tulo ka mga semana kauban ang dekalidad nga runners sa Tuscany Camp.
Si Tabal ug ang pambato sa nasod sa men's marathon nga si Jeson Agravante nag-una og larga sa track and field team aron masusi nilang daan ang rota sa marathon event.
“We’re doing the final conditioning—like small jogging, stretching, and continues tapering activities,” pasabot ni Tabal. Ang PHL track and field team adunay 38 ka mga atleta, 13 ka mga babaye ug 25 ka mga lalaki.
Si Tabal nakalangkat og silver medal sa 2015 SEA Games sa Singapore.
Ning higayuna, gipabuhagay ni Tabal nga buhaton niya ang tanan aron makahatag og gold medal sa Pilipinas.