Fajardo angay nang paduwaon?

So, sa makausa pa, ang Korea na usab maoy makontra sa Gilas Pilipinas sa unang knockout stage sa 2017 Fiba Asia Cup didto sa Beirut, Lebanon.

Kini human ang Korea yanong midabo-dabo sa Japan, 81-68, sa ilang knockout match niadtong Lunes sa gabii aron pagsulod sa sunod round diin ang Pilipinas maoy ila dayong ikasangka.

Sayo nga nakapugnit og luna ang Gilas sa quarterfinals human nila harusa ang tanang duwa sa Group B diin lakip sa ilang gibiktima mao ang defending champion China nga ilang gilubong, 96-87.

Gisunod nila ang Iraq (84-68) ug dayon ang Qatar (80-74).

Sa kasaysayan sa Fiba Asia Cup, kining Korea maoy perming mahimong babag sa kampanya sa Pilipinas, pero sa niaging 2013 Fiba Asia nga gipahigayon sa Manila gipildi sa Gilas ang Korea sa semifinals round aron makasungkit og puwesto alang sa 2014 Fiba World Cup sa Spain.

Importante kaayo sa matag habig ang panag-abot na usab sa Pilipinas ug Korea karong gabii sanglit ang modaog molahos man didto sa semifinals diin posibling makontra ang Iran samtang ang mapildi sayo nga mamutos ug manguli.

Ang pangutana. Moduwa na kaha si June Mar Fajardo niining krusyal nga mga duwa sa Gilas?

Ang Sugboanong higante nga maoy usa sa pinakaligong puwersa sa Gilas adunay gipamati nga pagpanakit sa iyang bagtak sa wa pa magsugod ang tournament.

Kinahanglan nga mopahuway siya og pipila ka adlaw sa dili pa kini makabalik og duwa. Kay nahuman na lagi ang tagal sa iyang pagpahuway, hayag ang posibilidad nga makaduwa na siya.

Pero unsa may komplikasyon kon paduwaon si Fajardo sugod karong gabii? Tinuod nga dako kaayo og ikatabang si Fajardo sa Gilas ilabi na sa ilawom nga bahin.

So kon mohugop ngadto ni Fajardo ang depensa sa Korea, makahatag kini og dakong bakanti sa mga shooters nga sila si Matthew Wright, Ryan Cruz, Roger Pogoy ug bisan gani ngadto nila ni Jayson Castro ug Terrence Romeo.

Pero di sab nato isalikway nga posibling maguba usab ang jelling o ang timplada sa Gilas nga maoy ilang nagamit sa sunodsunod nilang kadaugan.

Kini ra bang Korea naila sa ilang running game nga style sa duwa mao nga nagkinahanglan usab og speed ang Gilas nga ikaalkontra niini.

Sayod si coach Chot Reyes sa kalidad sa Korea, mao nga nagkinahanglan usab siya og igong puwersa.

Pero sa sitwasyon ni Fajardo nga daw sa wala pa sa saktong kondisyon, mahimong maalanganin usab siya sa paggamit niini.

Sa pangutana kon angayan ba nga gamiton si Fajardo ning duwaa? Only Chot Reyes knows.