P214T NABAWI GIKAN SA SAKRISTAN
‘MITULIS’ SA SIMBAHAN SA MABOLO NASIKOP; TINULIS GIPAMALIT
Nadakpan na sa Mabolo
police station inabagan sa Mambaling police station ang suspek sa pagtulis sa St. Joseph Parish The Patriarch sa Barangay Mabolo, siyudad sa Sugbo niadtong Lunes sa gabii.
Apan tipik na lang P400,000 ang nakuha kay gipamalit na kini og motorsiklo, flat screen nga TV, electric
fan ug higdaanan nga foam sa sakristan nga suspek.
Ang suspek giila nga si Alexander Lumapac 22, sakristan, lumad nga taga Samar, lalawigan sa Leyte apan kasamtangan nga nag-abang og pinuy-anan sa Basak San Nicolas sa syudad sa Sugbo.
Apan hugot niya gihimakak nga siya ang nagtulis sa kanhi madre nga si Roxanne Valmoria sanglit igo ra siya nga lookout ni alyas, Marwi,taga syudad sa Marawi.
Iyang gitug-an sa mga imbestigador sa Mabolo police station nga didto sila nagkaila ni Marwi sa Plaza Independencia ug didto siya gihaylo nga duna silay buhaton sa simbahan.
Apan matod ni Police Supt. Emelie Santos, deputy city director for operations ug kasamtangan nga hepe sa Mabolo police station, nga atol sa ilang pag-adto sa boarding
house niini, nakuha nila ang kapin sa P200,000 nga gituohan nga salin sa tinulisan niya nga kwarta sa simbahan.
Giangkon hinuon ni Lumapac nga gihatag kaniya ni Mawi ang kwarta ug iyang gipalit og brand new nga motorsiklo nga mobalor og P49,000; bag-ong TV set ug mga personal nga gamit sa sulod sa iyang lawak.
Matod ni Santos nga mga barangay tanod ang naghatag og impormasyon sa Mambaling police station human mamay-ungi ang iyang panagway tungod sa mga balita sa telebisyon.
Wa mahibawo si Lumapac nga gipangita na siya sa mga pulis ug nakurat nalang siya nga nangabot.
Nahibaw-an usab sa imbestigasyon nga di siya scholar sa simbahan kon dili nag-alagad siya mismo isip sakristan sud sa tulo ka semana human ni mangayo og panabang nga makatrabaho.
“Matod niya nga naa daw niduol niya. Ginganlan lang nga Marwi. Siya daw ang naghimo sa sketch sa simbahan nya iyang gihatag kang Marwi. Iya pang giwarn si Marwi nga pagbantay sa CCTV camera,” matod ni Santos.
Tungod sa maong kalamboan, gikonsiderar na sa CCPO nga sulbad na ang pagpanulis apan magpadayon sila sa ilang imbestigasyon nunot sa gihatag nga laing pangan sa suspek.
Matod ni Sr. Supt. Joel Doria, hepe sa Cebu City Police Office, nga ilang sutaon kinsa si Marwin kon di ba kini hinimo-himo lang ni Lumapac.