5 patay sa anti-drug operations sa Sugbo
Lima ka mga tawo ang nangamatay sa managlahing mga operasyon batok sa drugas sa mga awtoridad niadtong Martes sa gabii.
Lakip sa nangamatay mao ang usa ka pulis ug ang iyang asawa.
Si PO3 Ryan Quiamco ginganlan ni Presidente Rodrigo Duterte nga usa sa mga pulis nga nalambigit sa illegal drugs.
Niadtong Martes sa gabii, siya ug ang iyang asawa namatay sa giingong engkwentro tali sa mga sakop sa Regional Special Operations Group (RSOG 7) sa giingong buy bust operation.
Matod ni Sr. Supt. Jonathan Cabal, hepe sa Regional Intelligence Division sa Police Regional Office 7 nga mao usab ang nangulo sa buy bust
operation, ilang na transact si Quiamco og duha ka bulto sa
illegal nga drugas. Unang sabot nga sila mag abot ug magbinayranay sa Ayala pasado alas 3 sa hapon apan nibalik matod pa og
text sa pulis nga poseur buyer nga sa South Road Properties (SRP) na lang.
Pasado alas 6 sa gabii, ni- text na usab si Quiamco nga sa barangay Mohon mag-abot apan sa dihang nakamatikod nga pulis ang iyang gika- transact dali ning nipadagan sa iyang sakyanan paingon sa Barangay Pooc, siyudad sa Talisay.
Si Quiamco giingong unang namusil nga miresulta sa pagkaigo ni PO2 Jemuel Villaflores sa bukton.
Dinhi na nagsugod ang pinusilay.
Tungod sa pinusilay, dunay mga tawo nga naa sa kilid sa karsada ang nangaigo, usa niini dose anyos nga batang babaye.
“I think nakilala nya yung isang police na nag apprehend sana sa kanya, ang isang police na yun ay confined sa hospital for operation siya ngayon,” matod ni Cabal.
Gisaad ni Cabal nga sila ang moabaga sa galastohan sa mga naangol sa hitabo.
Patay diha diha si Quiamco samtang ang iyang asawa nga si Rizalyn namatay sa ospital.
Sa autopsy, nasuta nga si Rizalyn mabdos og upat ngadto sa unom ka buwan.
Gihimakak usab ni Cabal nga dunay nahitabong rubout.
Si PO3 Quiamco nisulod sa serbisyo niadtong Disyembre 2001 apan pagka2014 napagya na ang iyang ngan nalambigit sa illegal nga drugas. Nakuha sa kapulisan nga illegal drugs ug armas gikan sa sakyanan.
NAGA
Duha ang patay sa pinusilay tali sa kapulisan sa siyudad sa Naga ug duha ka mga street
level pusher sa Barangay Lanas, City of Naga pasado alas 9:00 sa gabii niadtong Martes.
Ang target sa ilang operation
mao ang usa ka Michael Pacaña, alyas Macky, 35.
Si PO2 Fernando Mata niingon nga atol sa ilang buy
bust operation nakabantay si Pacaña nga pulis ang iyang gikatransaksyon.
Dali kining nisibat ug nipabuto og armas sa mga pulis samtang ang iyang kuyog nga si Oscar Encabo, taga Barangay Bairan, nipusil usab sa mga pulis.
Nahitabo ang pinusilay sulod sa 30 segundos nga nakapatay sa duha.
Ang duha dali untang gidala sa Minglanilla District Hospital, apan gideklarar kining patay nang nidangat sa tambalanan.
Nasayran nga ang duha dugay nang gipanid-an sa kapulisan nga maoy tigpabaligyag illegal nga drugas sa maong lugar.
Ang kapulisan nakuha gikan sa crime scene og usa ka .38 caliber revolver ug mga bala samtang laing .357 caliber revolver ug mga bala.
NAPATAY SA PDEA
Napatay usab sa Philippine Drug Enforcement Agency (PDEA)-7 si Roberto Cruzpero, sa sitio Marcoville, Purok 6, brgy. Camputhaw, dakbayan sa Sugbo.