Club wa makabayad og buhis sa Mandaue
Di mominos sa P361,000 nga amusement tax ang wa pa nabayri sa Liv Superclub sa tuig 2016 sa kagamhanan sa Mandaue City.
Sumala ni Atty. Elaine Bathan, chief of staff ni Mayor Luigi Quisumbing, nga wa pay labot ang sa tuig 2017 ug ang penalty sa ilang kwentada.
“...They have been delinquent of the payment of their amusement tax for 2016. And they have also not paid their amusement taxes for 2017,” matod ni Bathan sa pakighinabi sa Superbalita Cebu kagahapon.
Usa sa mga tag-iya sa Liv Superclub sa City Times Square sa Mandaue mao si Kenneth Dong kinsa nalambigit ang pangalan sa bilyones nga shipment sa ilegal nga drugas gikan sa China.
Matod ni Bathan, base sa ilang imbestigasyon, late usab ang pagbayad sa buhis ang establesemento niadtong 2015.
“We expect that they will be a surge of a higher amount even in 2017 payment assessment of the tax. Because they have not yet paid, these taxes is subject for penalties,” dugang niya.
Gitahasan na ang city treasurer sa pagkwenta sa assessment sa amusement tax sa Liv ug base sa iyang bana-bana, moabot sa tunga sa milyon ngadto sa milyon ang bayaranan niini sa dakbayan sa tuig 2016 wa pay labot karong tuiga.
“They will be issued notices to pay this amusement taxes wherein they will be given 10 days to comply. If they will not pay this taxes then they will be recommended for closure,” pahibawo ni Bathan.
Kagahapon, gihatag na sa city hall ang notisiya niini sa club ug sigun ni Bathan nga ang 10 ka adlaw nga tagal epektibo sa higayon nga madawat na sa management sa club ang notisiya.
Giklaro ni Bathan nga nadawat na sa establisemento ang assessment sa tuig 2016 ug usa sa mga kawani ang nakadawat na niini.
Nasuta sa Superbalita Cebu nga niadtong Enero, na-isyuhan og temporaryong business permit ang Liv Superclub nga gikatakdang ma- expire Agosto 9, 2017, hinuon, nakakuha sila og business permit sa dakbayan niadtong Hunyo 22 nga balido hangtod Disyembre 31 ning tuiga.
Laing bar nga giimbestigar sa city hall karon mao ang The Lynx Club sud gihapon sa City Times Square tungod kay matod ni Bathan nga ang Liv SuperClub isip korporasyon sa lima ka tawo, lakip na ni Dong, usa man ka “minority shareholder” sa club.
Pasabot ni Bathan nga ilang gi- check tanang mga business interest ni Dong.
Nabalaka usab ang usa sa mga kawani ni Mayor Luigi Quisumbing kinsa iyang gitahasan pag-imbestigar sa legalidad sa operasyon sa Liv Superclub human kini nakadawat og pagpanghulga.
Sa dihang gikahinabi sa mga tigbalita, nagdumili si Quisumbing pagpangan sa kawani ug ang detalye kon giunsa ang iyang kawani paghulga.
Apan iyang giklaro nga di death threat ang pagpanghulga.
Sumala niya nga nahitabo ang pagpanghulga human gi-anunsyo sa city hall ang pagpalawom sa imbestigasyon sa operasyon sa club.
Dugang ni Quisumbing nga buot sa nanghulga nga ipahunong ug di pa palawman ang imbestigasyon mahitungod sa issue.