WAY AYUDA SA CITY JAIL: TOMAS
Hanap ang kahigayonan nga mohatag og financial
assistance si Mayor Tomas Osmeña ngadto sa Bureau of Jail Management and Penology (BJMP) alang sa pagkaon sa 4,700 kapin ka
mga piniriso sa City Jail.
Kini human nipadayag ang mga opisyal sa BJMP 7 nga andam silang mosunod sa kagustohan sa City Government ilabi na ang pagpaubos sa audit sa mga hinabang pinansiyal nga nahatag sa City Hall.
Apan si Osmeña niprangka nga sapagkakaron, ang nahitabo sa BJMP wa sa iyang prayoridad ug ang problema angay nga sulbaron sa BJMP ug di sa City Hall.
“It’s the lowest priority right now, I’m worried so with other things what happen to BJMP is the least of my concerns. Why don’t they solve their own problems,” matod sa mayor. Si Osmeña nihulagway nga usa sa bug-at nga hinungdan nga magdumili siya paghatag og ayuda sa BJMP mao ang padayon nga transaksyon sa drugas sud sa pasilidad.
“There is so much corruption in BJMP a lot of drugs emanate from there. Why will I spend city money if is just to going to corrupt people,” padayag ni Osmeña.
Gipadayag hinuon sa mayor nga iyang ipatawag si Konsehal Dave Tumulak, deputy
mayor on police matter aron hisgutan ang problema diin ang mga opisyal sa BJMP nagkanayon nga kon wa nay mapakaon sa mga piniriso, hayan magkagubot ang mga
inmate ug adunay riot nga mahitabo.
Gitug-an ni Jail Warden Arnel Peralta nga malangan ang ilang subsistence allowance sa mga inmate sugod September gumikan sa pagdagsa sa mga inmate gumikan sa war on drugs.