Hinabang sa mga senior patas-an

Giuyonan ni Mandaue City Mayor Luigi Quisumbing ang sugyot nga patas-an ang tabang pinansiyal sa mga senior citizen sa dakbayan apan buot una niyang limpyohan ang listahan niini nga grabe ang pagtaas.

Kahinumduman nga gisugdan na sa city hall ang paghatag sa P2,000 isip ikaduhang hugna sa tabang-pinansyal sa mga senior sa P6,000 nga ilang madawat gikan sa kagamhanan matag tuig.

Mokabat ngadto sa 17,586 nga na- verify nga mga senior citizen ang makadawat sa ilang financial assistance hangtod karong Biyernes.

Sa dihang nahinabi sa mga tigbalita, si Quisumbing nagkanayon nga gikan sa mga 8,000 ngadto sa 10,000 ka populasyon sa mga senior citizen sa dakbayan, niabot kini ngadto sa 25,000 kon sobra sa 200 porsiyento nga pagtaas sa populasyon.

“Ganahan ang city nga atong patas-an ang pension sa mga senior citizen sa city but unfortunately we’ve also been receiving reports that many of the people registering senior citizens in the city are not actually from Mandaue,” butyag ni Quisumbing.

Gani, paambit sa mayor nga aduna silay nasakpan nga senior citizen gikan sa Bohol, Liloan, Compostela, ug Bantayan ang nagparehistro sa Mandaue aron makakuha og benepisyo gikan sa dakbayan.