Well, that was just a lie
Mitupas paglingkod si Jude nako. Nakatan-aw kog dugay niya. “Nagkasakit ka ba, Jude?” Namatikdan dayon nako ang kausaban sa panglawas ni Jude. Namiyahok ang iyang mga aping.
“Nag- adjust pa ko sa sulod sa seminaryo, Susette. Siyempre, naa gyud nang kamingaw. Ang kalaay. Nabag-ohan lang tingali ko sa bag-ong lugar nga akong nahimutangan.”
Dugay kong gitutokan ni Jude. Unya nagpahiyomay mi. Kamingaw? Ah, bation gyud ni sa tawo kon nahilayo sa mga minahal sa kinabuhi.
“Sa imong parents?” Nakaingon ko.
“Oo, sa ilang Mama ug Papa. Ug kanimo.”
Mikatawa ko. Nahapak kog hinay ang bukton ni Jude.
“Hilom diha, uy, Jude. Nganong mingawon ka man kuno nako, bi?”
“Aw, friend man ta. Espesyal ka sab diri, o.”
Gitudlo ni Jude ang wala niyang dughan, sa dapit sa iyang kasingkasing. Mitan-aw ko sa lawod. Di ko makaharong sa tinan-awan ni Jude nako.
“Ayaw samoka ang imong hunahuna, Jude. Don’t forget, magpari ka.” Miseryuso ko.
“Wa ko malimot ana, Susette. Pero di mo sab kapugngan ang usa ka gugma nga sukad sa sinugdanan naghasol nako. Ikaw, nganong midaot man sab?”
Nakatan-aw kog balik kang Jude. Mikatawa na sab ko.
“Daot gud tawon? Wa ko modaot, uy!”
Mitan-aw na sab ko sa lawod. Miseryuso na sab ko. Husto si Jude. Midaot sab ko. Namatikdan ko ni kon manamin ko. Klaro sa akong mga aping nga namiyahok. Miluag sab ang akong mga karsones.
“Tungod ba sab sa usa ka gugma nga lagmit di katagaan og katumanan, Susette?”
“Di, uy! Sa ako tingali ning pag-eskuwela. Tagdugay man gud kong matu’og kay magtuon ko sa akong mga klase. Daghan sab og mga assignments ning
college na ta, uy!” Nakapanghupaw ko. Nahilom ming duha si Jude. Taas nga kahilom. Mao ray madungog ang tinapya sa mga balod, ug ang tingog sa mga langgam sa among palibot. Unya mitindog ko. Mitindog sab si Jude ug naglakaw-lakaw mi sa puting balas.
“Nganong nia ka man diay, Jude?”
“Well, gusto kong magkita ug magkaestorya ta. Ang imong
parents ang nag-ingon nako nga nia ka dinhi sa inyong resthouse. Kadyot ra ko dinhi. Gusto lang tikang makita. Mobalik dayon ko sa seminaryo.”
Nagkadungan mi sa pagpanghupaw si Jude. (SUMPAYAN)