TAMBAGI KO, NOY KULAS

Duna kahay lain

Dear Noy Kulas,

Just call me Basil, taga Mindanao pero naa na diri nag work. Naa koy live in partner sa amoa sa Mindanao ug duna mi usa ka anak. While naa ko sa Cebu, ang akong parents nisulti nako nga naay laing lalake ang akong partner. Pero deny to death siya dihang akong gitawgan. Niuli ko sa amoa aron klaruhonan ang tanan kay gahago ko nga malayo para nila. Ni deny siya og maayo mao nituo na lang sab ko.

Nibalik ko diri sa Cebu. Pila pa lang ka days ang milabay, naay nag PM nako sa Messenger og pictures sa akong partner ug sa lalake. Sweet kaayo sila. Ako siyang gitawgan ug niangkon siya nga iyang classmate sa college to kay nag reunion sila. Gibutangan ra kuno og malisya ang picture. Naa diay maggaksanay nga duol kaayo ang nawong?

Ang problema nako ron kay mabdos siya. Nagduha duha na hinuon ko kon akoa ba ang iyang gisabak. Unsa may akong buhaton, Noy? Daghang salamat. BASIL

Basil,

Kon nagduda ka, angay kang mosusi sa ubang sources, apil na nianang nagkuha sa picture ug nipadala nimo kay basin baya tinuod nga gibutangan na og malisya. Naa ra bay uban nga babaye ug lalake nga tungod sa ka suod kaniadto ug nakainom sa reunion, maingon niana ka sweet. Labina kon wa ang mga partner nakakuyog sa mga nag- reunion, naa gyuy mokiat. Pero mahimo usab lagi nga tinuod nang dunay something in between ug ang pictures nagsulti og liboan ka mga pulong kabahin niini.

Nagduda man gyud kaha ka, pauli ug panid-i nga di siya makahibawo or magsugo ka og kasaligang tawo nga maoy maniid para nimo. Pinaagi niini, makompirmar mo nga tinuod ang mga estorya nga duna siyay laing lalake nga gihigugma gawas nimo.

Kon tinuod ang mga estorya, mogasto ka kon gusto kang masusi kon imo ba ang gisabak sa imong partner pinaagi sa DNA test. Unya ra ba di ni barato kay maorag sa Manila pa ni nga process, wa pa diri sa atoa. Ikaw na ang modesisyon kon imo ba kining buhaton o di. Imo pa bang dawaton ang imong live in nga duna nay lain nga gimahal. Di ni sayon nga desisyon. Pag-ampo sa Ginuo nga giyahan ka ug hatagan og kusog ning imong problema karon. NOY KULAS