BUDLER KUYAW NGA CHALLENGER: MILAN
Nasayod si International Boxing Federation (IBF) light flyweight champion Milan “El Metodico” Melindo kon unsa ka lisod ang umaabot niyang tahas hinungdan nga wala kini molugak bisan gamay sa iyang preparasyon.
Ang ALA fighter modepensa sa iyang korona sa labing unang higayon batok sa usa sab ka world champion nga si International Boxing Organization (IBO) light flyweight king South African champion Hekkie “Hexecutioner” Budler karong Septiyembre 16 sa Pinoy Pride 42 sa Waterfront Hotel and Casino sa Lahug, Cebu City.
“Iba ang unang depensa ko po,” pasabot ni Melindo sa interbyu sa ABS-CBN News. “Iyong iba kasi, mandatory challenger lang, ako world champion agad ang kalaban ko.”
Naangkon ni Budler ang IBO light flyweight title pinaagi sa paglupig sa laing Pinoy nga si Joey Canoy niadtong Pebrero.
Si Melindo adunay 36-2, 13KOs nga rekord samtang si Budler naggunit og 31-2, 10KOs nga baraha.
“Hindi na iba sa kanya ang lumaban sa Pinoy. Matapang na boxer, masuntok, pasok ng pasok. Brawler din po siya,” dugang ni Melindo.
Si Melindo nagtagana og tulo ka mga buwan alang sa iyang pagpangandam batok kang Budler.
Nakahuman na siya og upat ka mga semana ug aduna pa’y laing upat ka mga semana siyang sagubangon nga hugot nga pagbansaybansay.
Ang headcoach sa ALA gym nga si Edito Villamor miangkon nga delikadong challenger si Budler apan alang kaniya, mas bintaha si Melindo kon abilidad ang hisgutan.
Gipasabot ni Villamor nga ilaha nang gitun-an og insakto ang away ni Budller pinaagi sa pagtan-away og video sa mga away niini.