DUWA SA MGA NAGKAGIDLAY
Mga duwa karon 5:15 pm- SWU batok CITU ( jrs) 6:45 pm- SWU batok CITU (srs)
Magsangka ang parehong nagkagidlay nga Southwestern University (SWU)-Phinma Cobras ug Cebu Institute of Technology University (CITU) Wildcats sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.
Ang duha ka mga kampo parehong wala pa nakatilaw og kadaugan sa tungatungang bahin sa 1st round elimination.
Ang Cobras nasubhan og 49-59 nga kapildihan batok sa University of Cebu (UC) Webmasters niadtong Agusto 5 pagsugod sa torneyo unya nasundan kini og mas dakong kapildihan batok sa University of San Jose Recoletos (USJR) Jaguars, 103-88, niadtong Agusto 12.
Sa ilang bahin, ang Wildcats nabunyagan og 72-82 nga kapildihan batok sa University of Southern Philippines Foundation (USPF) Panthers niadtong Agusto 6.
Mas grabe pa ang nasinati sa Wildcats sa nagsunod nilang duha ka mga duwa kay nakatilaw sila og grabeng kastigo batok sa Jaguars, 60-97, ug University of San Carlos (USC) Warriors, 39-60.
Sa pagkawala ni coach Raul “Yayoy” Alcoseba, kinsa mitapon sa UC Webmasters, daw nawala sab ang puwersa sa Cobras nga nagpahimo kanila nga title contender kaniadto.
Ubos sa paggiya ni coach Mike Reyes, gilauman nga hinayhinay ra’ng makabangon ang Cobras.
Ning sangkaa, makonsiderar nga inilog og gamay ang Cobras apan wala kini nagpasabot nga wala na’y daganan ang Wildcats.
Ang Cobras mosalig og maayo nila ni Jovani Luz, Edmundo Bayhunan, Gerald Fernandez, Shaquille Imperial, Reeve Ugsang, ug Mark Racho.
Ang mga pambato sa Wildcats mao sila si Steven Bucao, Mark Kong, Mariel Munez, Kerr Nemil, ug Nino Rosell.
Sa premirong duwa, magsangka ang mga manghod sa duha ka mga kampo nga mao ang Baby Cobras ug Wildkittens.
Ang Baby Cobras adunay 1-1 nga rekord samtang ang Wildkittens naggunit og 0-3 nga baraha.
Sa laing bahin, gipangbuntog sa college defending champion University of the Visayas (UV) Green Lancers ang USPF Panthers, 92-79, niadtong Martes.
Ang Green Lancers mingsaka sa 2-1 nga rekord samtang ang Panthers nangatagak sa 1-2 nga baraha.
Sa laing duwa, gipangmakmak sa high school defending champion Sacred Heart School-Ateneo de Cebu (SHSAdC) Magis Eagles ang Don Bosco Technological Center (DBTC) Greywolves, 58-50.
Mingsaka man tuod sa 3-0 ang rekord sa Magis Eagles apan natangtangan sila og usa ka lig-ong haligi human naangol ang ilang All-Star guard nga si Andrew Velasco, kinsa nabalian og tiil.
Ang Greywolves mingdakin-as sa 1-2 nga rekord.