PEKE NGA AGENT TIPI SA BUY BUST SA PDEA 7

Lalake nga nalambigit sa illegal nga drugas sa Brgy. Mabolo, dakbayan sa Sugbo ug nagpatuong agent sa PDEA 7 sa ilang lugar napatay atol sa gihimong buy bust operation sa Philippine Drug Enforcement Agency 7 human mangilog og armas sa usa sa mga operatiba.

Ang napatay giila nga si Ronald Aznar 48, taga barangay Mabolo, sa syudad sa Sugbo giila nga high value target sa PDEA 7. Matod ni Leia Albiar, information officer sa PDEA 7, nga nakadawat sila og reklamo labot sa kanunay nga pagpakita og armas ni Aznar sa ilang lugar ug magpaila nga sakop sa PDEA.

Ila dayon nga goipanid-an si Aznar sud sa usa ka buwan ug dinhi ilang nasuta nga tinuod ang reklamo sa barangay.

Alas 7:45 sa gabii niadtong Miyerkules, ila dayon gihimo ang buy bust operation sa may MJ. Cuenco Avenue luyo sa usa ka hotel.

Sa dihang nasikop, nakuhaan og upat ka bulto sa gituohang shabu nga motimbang og 20 gramos.

Atol sa imbestigasyon, iyang gitug-an kinsa ang iyang supplier ug andam siya nga itudlo ang panimay niini.

Gipasakay siya sa sakyanan sa PDEA 7 ug sa dihang naabot na sila sa balay sa giingong

supplier, ilang gipanaog si Aznar ug gikuhaan og pusas.

Apan kalit lang kini nga nangilog sa armas sa usa sa mga PDEA agent apan naunhan siya sa pagpusil.

Lakip sa nakuha kaniya ang upat ka dagkong pakete sa gituohang shabu nga gibana-bana nga mobalor og P100,000, duha ka gituohang peke nga ID sa Interpol ug peke nga

drivers license, usa ka cellphone, usa ka kalibre .45 nga pistola ug magazine ug bala niini, t-shirt sa PDEA, teleskopyo, bag nga dunay logo sa PDEA ug usa ka kevlar helmet.

Nakakuha og kasayuran ang PDEA a-7 nga dunay grupo si Aznar nga magpaila nga sakop sa PDEA-7 aron mangronda sa mga drug personalities diin ang ilang dinakpan pangayoan og dakong kantidad.

Matod ni Director Yogi Filemon Ruiz nga makadaghan na sila makadawat og reklamo labot sa pagpangronda apan buhian ra human makadawat ug kwarta bisan kon wa silay gihimo nga anti drug operation.

“Ang ilang modus mosulod sila og usa ka lugar. Magpa- pretend sila nga PDEA agents. Ilang dakpon human nilag dakop ilang kuhaon ang drugs ug kwarta. Sila ra pud ang mobaligya,” matod ni Ruiz. /

/ ALAN TANGCAWAN ■ MGAID: Mao kini ang mga identification (ID) card nga nakuha sa Philipine Drug Enforcement Agency (PDEA) 7 gikan kang Ronald Aznar, nagpatuong agent sa mao nga ahensya.