ASLANAN SA RICO’S GISIRHAN SAB
CITY HALL MI-SERVE SA ORDER KAY ‘WAY’ BUSINESS PERMIT
Giparisad-an sa Cebu City Government ang ihawan ug litsonan sa Rico’s Lechon sa Barangay Talamban, duha ka semana human gitak-opan sa City Hall ang iyang duha ka restaurant gumikan sa pag-operate nga way mayor’s business permit.
Kagahapon sa buntag, giserved sa special team sa buhatan ni Mayor Tomas Osmeña pinangulohan ni Paul Taboada, ang closure order batok sa ihawan ug litsonan ni Rico Dionson.
Si Taboada nagkanayon nga gisirad-an ang pasilidad gumikan sa kakuwang sa business permit gikan sa Office of the Mayor, usa ka kalapasan sa Cebu City Tax Ordinance No. 69.
Wa sa iyang litsonan si Dionson, ang tag-iya sa Rico’s Lechon, ug ang closure order gidawat sa manager sa iyang ihawan.
Matod ni Konsehal Dave Tumulak, deputy mayor on police matters, malinawon ang pagsirado sa ihawan.
Atol sa pagsirado, aduna pay tulo ka mga baboy nga giluto ug gitugotan ra usab sa mga opisyal sa City Hall nga mahuman og luto human nihangyo ang staff ni Dionson.
Si Alma Corpin sa City
Health maoy niinspekyon sa ihawan sanglit adunay mga
report nga nadawat ang buhatan ni Osmeña nga ang hugaw sa baboy ipaagas lang sa sapa.
Matod ni Corpin nga nanginahanglan ang ihawan og environmental compliance certificate (ECC). Ang Department of Veterinary Medicine and Fisheries (DVMF) nga gipangulohan ni Dr. Alice Utlang nagkanayon nga nibayad og rehistrasyon sa iyang ihawan si Dionson niadtong Mayo.
Sa iyang nakita, limpyo ang ihawan apan ang mga silingan nireklamo sa hugaw sa baboy nga giingong gilabay sa sapa.
Si Osmeña, sa iyang bahin, nagkanayon nga bisan unsa ka suod niya ang tag-iya sa
business establishment kon nakalapas, iya kining sirad-an. Iyang gipasabot mao ang
business partner ni Dionson nga si Bea Villegas-Osmeña,iyang umagad, kinsa nanag-iya sa 30 porsiyento niini.
Nagsugod ang giingong paggukod sa negusyo ni Dionson dihang ilang giingnan ang ilang business partner nga si Bea nga magsolo na sila og dumala sa Rico’s Lechon human mi- expire ang ilang kontrata niadtong Hulyo. Ilang gibasol ang book keeper ni Villegas kinsa maoy gitahasan sa paglukat og mga
permit apan wa makalukat hinungdan nga temporary permit
ra ang ilang gihuptan. Gipasalig nila nga kon mahuman na sila og lukat sa ubang mga dokumento ilang iduso ngadto sa buhatan ni Osmeña aron sila makaabli og balik.
Apan ang mayor nagkanayon nga wala pay sigurado nga makabalik sila og abli dihadiha sanglit adunay proseso nga gisubay ug ang mayor’s
business permit kabubut-on sa mayor ang masunod og moisyu ba o dili.
SPA GISIRAD-AN
Gisirad-an usab kagahapon ang Chuva-Chuva, usa ka lingam massage spa sa dalan Tres Borces, sa barangay Mabolo gumikan sa pag- operate nga way mayor’s business permit.
Gilangkuban nilang Taboada, Tumulak ug Susan Berido sa Prevention, Restoration, Order, Beautification and Enhancement (Probe) team.
Atol sa pagsira, way giatiman nga mga kustomer ang mga masahista sa Chuva-Chuva ug ilang gipadayag nga mosunod sila kamandoan sa Siyudad.
Si Tumulak nagkanayon nga aduna pay posibilidad nga subli pa silang makaabli apan kon dili sila mosunod sa mando sa City Hall ug mo- operate lang gihapon bisan kon adunay kamanduan, di na sila makaabli pa og balik. /