18 sikop sa druga, sugal

Dili mominos 19 ang nangasikop, 7 ang nalambigit sa ilegal nga druga ug 11 ilegal nga sugal, sa kapulisan sa dakbayan sa Mandaue atol sa anti-criminality campaign operation niadtong Huwebes.

Di mominos sa 20.4 gramos sa giituohang shabu ug armas nga may bala ang nasakmit.

Unang nasikop sa kapulisan mao sila si Ian Revales, 32, minyo ug taga Tagba-o ug Judhel Reyes, 21, taga Lorega San Miguel, Cebu City; ug Ruffa Marie Dy, 25, taga Jagobiao, dakbayan sa Mandaue.

Ang City Drug Enforcement Unit sa dakbayan nihimo og operasyon sa Deca Homes, Cubacub niadtong Huwebes sa hapon aron pagsikop sa usa ka ginang nga nailhan nga si “Madam” apan nakaipsot.

Ang mga suspek nasikop mismo sud sa giabangang balay ni Madam.

Nakuha gikan sa mga suspek ang usa ka gamay, 10 ka medium nga pakete sa gituohang shabu, P500 nga buybust money ug P2000 nga gituohang kinitaan.

Motimbang ngadto nga 20.4 gramos nga shabu ang nakuha gikan sa tulo nga may street value nga P400,000.

Samtang nasikop usab sa mga kawani sa Station 2 sa MCPO sila si Martin Labandero, 24, taga Kantawan, Naga, Cebu; Lyndon maglinte, 34, taga Mabolo, Cebu City, Hilt Batuigas, 47, taga Bantayan Island, ug Carlo naparete, 20, taga Opao sa Mandaue.

Nakuha gikan kanila ang tulo ka gagmayng pakete sa gituohang shabu, usa ka pakete sa gituohang marijuana, .38 kalibre nga armasnga may 3 ka buhing bala.

Sa laing bahin, 11 ka mga tawo ang nasikop sa nagkadaiyang estasyon sa Mandaue City Polcie Office (MCPO) tungod sa ilegal nga sugal nga niresulta sa pagkakumpiska sa P960 nga pusta.