Mandaue, Kapitolyo nagkasabot

Magpinirmahay og kasabotan karong Martes ang kagamhanan sa lalawigan sa Sugbo ug kagamhanan sa dakbayan sa Mandaue alang sa opisyal nga pagtapos sa joint venture agreement ug ang pagpalit sa siyudad sa Cebu International Convention Center.

Kagahapon, nagtigom ang mga opisyal sa provincial

government ug Atty. Elaine Bathan, chief of staff ni Mandaue City Mayor Gabriel Luis Quisumbing, sa Kapitolyo alang sa han-ay nga pagbalhin sa mga butang nga anaa pa sa CICC.

Ang Sangguniang Panlalawigan sa Sugbo nitugot kang Gobernador Hilario Davide III sa paglagda sa kasabotan aron hingpit na mahuman ang joint venture agreement tali sa Mandaue City Government ug mabaligya ang CICC ngadto sa dakbayan sa kantidad nga P300 milyones.

Si Bathan nibutyag nga kaduhaon nila og bayad ang kantidad sa Kapitolyo.

Matod niya sa higayon nga mapirmahan na ang kasabotan ug ang kontrata sa pagbaligya, hikayon usab sa City Government ang pagbayad pinaagi sa tseke.

Sa kasamtangan, gipahimutang sa CICC ang mga butang alang sa social services sa Kapitolyo ug gipaabot nga mabalhin kini sa warehouse nga gipatukod sa lalawigan nga mahuman sa unang quarter sa sunod tuig.