Nanagpa kay sakpan nag-date

(Napatik sa Agusto 9, 2017)

Tanggong sa prisohan ang usa ka ulitawo human iyang gisagpa ang iyang uyab kay nasakpan siya nga laing babaye ang gika-deyt. Ang insidente nahitabo didto sa Illustre Street, Barangay 3-A, Poblacion District, siyudad sa Davao. Gibalhog sa prisohan sa San Pedro Police Station si alyas Jasper (bansagon gitago), 24, residente sa Barangay 76-A Bucana ning siyudad, kinsa gireklamo sa iyang uyab nga si Maylen, 21. Subay sa impormasyon gikan sa Women and Children’s Protection Desk (WCPD) sa San Pedro Police Station nasayran nga giukoy ni Maylen si Jasper kay nasayran niini nga duna kini laing babaye. Giingong gisundan ni Maylen si Jasper ug didto sa usa ka kan-anan sa Illustre, sweet kaayo ang duha nga nangaon ug mahulagway nilang duha nga dunay tago nga relasyon gumikan naghinungitay pa og pagkaon. Sa kapungot ni Maylen, mipakita kini kanila kinsa namulong nga grabeng sukoa hinungdan nga napungot si Jasper ug iyang natamparusan si Maylen nga miresulta sa pagdugo sa iyang baba. Suma sab sa lalaki, nahimo niya ang pagpangita og laing babaye tungod kay duna say laing lalaki si Maylen nga gitug-an sa amigo ni Jasper ngadto sa WCPD. Gisuwayan og kuha sa Superbalita Davao kagahapon ang bahin ni Jasper sud sa prisohan sa San Pedro apan nagdumili kini sa paghatag og pamahayag labot sa hitabo. / Jeepy P. Compio