Tumang kahago

Dili lang usa sa akong mga amigo ug amiga ang nangutana kung naa ba ko’y kailang mananambal sa ilang nanglagas ug nagka-nipis na nga buhok apil akong ig-agaw nga si Jun kay nangapahak iyang ulo nga porma’g lingin nga mas dagko pa sa piso.

Akong gipangutana akong suod nga higala nga usa ka Dermatologist, si Dr. Lerma Perez sa Mabolo, sa mga rason nganong na-ingon.

Pulong niya, kini usa sa mga kumon nga simtomas o indikasyon sa tumang kahago o

stress. Gawas ining pag-panglagas sa buhok, mahibaw-an sab nimo nga ang imong lawas mireklamo na sa tumang kahago kay dili na normal ang kinatugan. Maglisod na pagpiyong sa mata kay daghang gi huna-huna. Ang resulta, maglimbag-limbag inig higda, magmata’g buntag, magkuwang sa katulog nga mo resulta sa pagpanlapoy sa lawas nga wa nay halos umoy o murag naglutaw, pagpangluya ug pagkaduka.

Ang uban sab makasinati og pagpanakit sa kalawasan, pagpaspas sa ginhawa ug pitik sa kasing-kasing, pagsakit sa tiyan, paglabad sa ulo, pagtukar sa arthritis, diarrhea, ulcer, pagpangsa dughan, og pagtaas sa pressure sa dugo. Gani ang uban mawad-an na og gana makighilawas sa ilang pares.

Ang timbang sab sa lawas magkabuang. Usahay moubos ug magniwang kay wa nay ganang mokaon, ang uban sab motaas ug motambok kay magpunay na lang sab og kaon.

Kasagarang ma stress nga taas og rangko , daghang tawo nga gidala o nagkupot og dagko ug sensitibong posisyon sama sa mga supervisors o

managers, naghuna-huna gihapon sa ilang trabaho ug trabahoon, obligasyon og sapi nga makita bisag na-a na sa ilang balay. Misamot kay ang uban dad-on pa gyud ang ginbuhaton sa balay.

Duna say uban nga daling mawad-ag pasensiya kung ma

stress. Dali kini silang ma-irita ug masuko, dili ka agwanta ug dili kadawat og sayop. Mokalit lang og ka usab ilang mood. Ang resulta, daghang sayop ug nagkalandrakas na hinuon ang agi sa trabaho o pagtuon.

Kung dili matabang ug ma-agapan og sayo kining tumang kahago, posibling magka-sakit sa lawas ug pangisip sa dayon.