Tabangan pa unta sa Uber

Human makatimaho nga anaa sila sa apiki nga habig, dali nga nakapangayo og pasaylo ang Uber ngadto sa Land Transportation Franchising and Regulatory Board (LTFRB). Dili pa igo, mitanyag kini og P10 million nga multa aron lang ilibkas ang usa ka buwan nga pagkasuspenso niini nga maoy resulta sa ilang pagsupak sa mando sa LTFRB nga hunongon na ang pagpanawat og aplikante sa mga driver/ operator.

Gawas niini, bisan og gipahamtangan sa pagkasuspenso, daw sa ila pang gihagit ang LTFRB tungod kay nagpadayon gihapon sila sa ilang operation.

Gipasalig sa Uber nga mohatag sila og financial assistance ngadto sa mga naapektohan nilang nga mga driver kinsa sa kalit lang nawad-an sa ilang kapanginabuhian.

Sa niaging Martes dinhi sa Sugbo, ang LTFRB 7 nakadakop og duha ka driver sa Uber nga padayon nga nagbiyahe bisan pa man nga kini gisuspenso.

Ang nangasikop nga namasahero sa General Maxilom Avenue, dakbayan sa Sugbo mao sila si Dennis Juanite ug Brian Estillore nga pulos nagmaneho sa Toyota Vios nga sakyanan.

Si LTFRB 7 Director Ahmed Cuizon mibutyag nga ang matag usa kanila pamultahon og P120,000 ug tanggungon og tulo ka buwan ang ilang sakyanan.

Kadako niining kantidara. Imbis nangyawat intawon ang duha nga makapangibuhi alang sa ilang pamilya, pamultahon na hinuon sila sa ingon aning kantidad.

Kon matinud-anon ang Uber sa ilang pamahayag nga ilang tabangan ang ilang mga partner/driver, kini maoy angayan nilang tabangan kay di unta ni sila maingon ani kon dili pa tungod sa ilang pasalig.