Ang kawat sa simbahan
Kadtong alarma sa St. Joseph The Patriarch Parish sa Mabolo, Cebu City subling nagpahinumdum kanato nga ning panahona di luwas ang mga balay alampoanan batok sa mga badlongon sa katilingban.
Nagpahinumdum sab ni nato nga bisan ang mga kandado di garantiya nga makapabalipod sa gitago nga kuwarta o kabtangan. Sa pag- cover nako sa maong alarma ang nisud sa akong hunahuna duha ka kawat ang nahitabo.
Ang una mao ang pagkawat sa yawe sa pinugsanay nga paagi ug ang nisunod mao ang pagkawat sa salapi nga gitagoan sa opisina nga nahimutang sa silong sa konbento. Ang pait kay sa dihang gikawat ang yawe puerting bunoga sa naghupot niini.
Sigun sa imbestigasyon sa kapulisan gitumbok ang usa ka Alexander Lumapak alyas Alex nga maoy responsabli sa pagkahanaw sa kapin kung kulang 400 mil pesos nga collection sa simbahan alang tibuok adlaw nga Domingo.
Ang krimen nahitabo Domingo sa gabii. Usa ka Roxan ang naghupot sa yawe nangangha kay sa dihang nisaka siya padung sa iyang katulganan may tawo na nga nagpaabot kaniya ug gibun-og una siya dayon gikuha ang yawe.
Nabuntagan si Roxan nga nagkadugo nga nagpahibawo sa mga imbestigador nganong wa manatikdi sa guwardiya ang kalandrakas ug ang iyang pagsiyagit ug pakitabang.
Paglabay sa duha ka adlaw nadakpan si Lumapak didto sa iyang boarding house dala ang nahabilin nga salapi nga moabot ug 214 mil pisos. Narecover sab ang brand new nga motorsiklo, flat screen TV ug ubang kagamitan.
Iyaha ning pinalit gamit ang kinawat nga salapi. Sa
interview nako giangkon ni Lumapak ang krimen apan iyang gitumbok ang usa ka gihinganlan ug Marwe nga maoy utok ning tanan.
Si Marwe iyang nakaila didto sa Plaza Independencia ug iyang gitug-anan sa iyang problema sa bayranan sa boarding.
Kini si Lumapak nga taga Samar nagtungha sa kolihiyo ug nakapuyo sa simbahan ug pipila ka semana mao nga nasuheto siya didto.
Sa ilang estoryahanay nahisgutan niya kini kang Marwe ug naumol ang plano sa kawat. Pasangil ni Lumapak igo ra siya nga nitultul ug nihatag ug sketch kang Marwe asa pangitaon ang yawe; kinsay naghupot niini ug ang nahimutangan sa kuwarta.
Matod niya nagpaabot ra siya usa ja tindahan kanus-a mahuman si Marwe sa iyang misyon. Kung atong tuhoan si Lumapak mogawas nga biktima ra sab siya sa pasalig ni Marwe.
Gipasaligan man siya nga sulbaron ang iyang problema sa bayrunon sa boarding
house ug sa eskwelahan. Pero ang nakasayop niya kay nisugot siya nga ang kuwarta sa simbahan ang gamitong sulbad. Maayo unta to kung nangawat si Marwe sa lain unya gibahinan siya. PRINTED AND DISTRIBUTED BY PRESSREADER